الخميس، ٢٧ ديسمبر ٢٠٠٧

تاج تاج


تاج جالى هدية العيد من الجميلة اية صاحبة مدونة بلا نيلة ايامنا سابقا شكرا اية نبداء بسم الله الرحمن الرحيم

لو مكنتش مصري بس عربي كانت هتبقى إيه نظرتك للمصريين واللي بيحصل في مصر دلوقتي؟


والله وبصراحة كانت هتبقى حسب الدولة الى هكون بنتمى اليها ففى بعض الدول تتمنى لنا الخير وتساعدنا ودول اخرى بدون ذكر اسماء تتمنى لو اننا مشينا من الخريطة خالص واظن انتم عارفينها للاسف عربية


لوكنت أوروبي أو غير مسلم هتبقي إيه نظرتك للعرب والمسلمين؟

طبعا هنظر لينا كاننا همج وعايزين نتقتلهم لان احنا للاسف الى بنوصلهم الاحساس دة قبل غيرنا

لوقالولك إنت بقيت رئيس جمهورية هتعمل إيه؟

ياسلام والله هعمل حجات كتير قوى اولها هحاول اضع الرجل المناسب فى المكان المناسب وبكدة كل واحد هيصلح المكان الى هو فية

لوسمح لك برؤية الرسول عليه الصلاة والسلام وإنك تقوله كلمة واحدة ؟

سامحنا على تفريطنا فى حققك

لو كنا في عصر ازدهار الأندلس كنت تتخيل نفسك إزاي؟

انى هكون انسانة متعلمة بجد ومثقفة بجد وقاعدة فى حلقة ادبية بسمع الاشعار الاندلسية

لو خطبت واحدة أو اتخطبتي لواحدوأثناء الخطبة اكتشفت أو اكتشفتي إن الطرف الآخرغير قادر على الإنجاب هيكون ايه تصرفك؟

لو بحبة ومتاكدة انة احسن واحد ليا اكيد مش هسيبة الحب عندى اغلى من اى شى فلنفرض انى تزوجت انسان اخر وليس بينا حب هتسبب فى شقاء اولادى لانى جبتهم فى بيت خالى من الحب

لو طلعت القمر هتكتب عليه ايه؟

بكتب اسمك يا حبيبى

لو مررت التاج لحد وماجاوبش هتعمل ايه؟

والله هزعل بجد بس هقدر مشاغل الناس

نمررة بقى لمين

د / اياد

محمد سمير صاحب مدونة غمض عنيك

احمد صاحب مدونة الله الوطن المدونة




السبت، ٢٢ ديسمبر ٢٠٠٧

حالة حب

اعيد اكتشاف نزار قبانى فما اجمل ما كتب فى الحب اعجبتنى هذة القصيدة فهى كل ما تتمناة امرة تحب من حبيبها واجمل ما تقولة وتعطية فعلا اجمل تعبير عن احساس امراة تحب
متى ستعرف كم أهواك يا رجلا*****أبيع من أجله الدنيـــا وما فيها
يا من تحديت في حبي له مدنـا*****بحالهــا وسأمضي في تحديهـا
لو تطلب البحر في عينيك أسكبه****أو تطلب الشمس في كفيك أرميها
أنـا أحبك فوق الغيم أكتبهــا*****وللعصافيـر والأشجـار أحكيهـا
أنـا أحبك فوق الماء أنقشهــا****وللعناقيـد والأقـداح أسقيهـــا
أنـا أحبك يـا سيفـا أسال دمي****يـا قصة لست أدري مـا أسميها
أنـا أحبك حاول أن تسـاعدني****فإن من بـدأ المأساة ينهيهـــا
وإن من فتح الأبواب يغلقهــا*****وإن من أشعل النيـران يطفيهــا
يا من يدخن في صمت ويتركني**في البحر أرفع مرسـاتي وألقيهـا
ألا تراني ببحر الحب غارقـة*****والموج يمضغ آمـالي ويرميهــا

إنزل قليلا عن الأهداب يا رجلا***مــا زال يقتل أحلامي ويحييهـا
كفاك تلعب دور العاشقين معي**وتنتقي كلمــات لست تعنيهــا
كم اخترعت مكاتيبـا سترسلها**وأسعدتني ورودا سوف تهديهــا
وكم ذهبت لوعد لا وجود لـه****وكم حلمت بأثـواب سأشريهــا

وكم تمنيت لو للرقص تطلبني***وحيـرتني ذراعي أين ألقيهـــا
ارجع إلي فإن الأرض واقفـة*****كأنمــا فرت من ثوانيهــــا
إرجـع فبعدك لا عقد أعلقــه****ولا لمست عطوري في أوانيهــا
لمن جمالي لمن شال الحرير لمن**ضفـائري منذ أعـوام أربيهــا
إرجع كما أنت صحوا كنت أم مطرا***فمــا حياتي أنا إن لم تكن فيهـا


الخميس، ١٣ ديسمبر ٢٠٠٧

خروف استرليا



كلاكيت خمسين مرة
كل عام وانتم بخير ومصر كلها بخير وخرفانها بخير طبعا بهنيكم بعيد الاضحى المبارك ويارب كدة كلنا السنة الجاية ان عشنا ان شاء الله يكون ربنا كرمنا ونقضى الوقت دة فى بيتة الحرام ان شاء الله يكرمنا جميعا طبعا هتستغربوا كلمة وخرفنا بخير والله الموضوع دة شغلنى كتير ومش عارفة اكتب فية ازاى كل عام وفى نفس الوقت من السنة وقبل بداية عيد الاضحى تبداء تلك المناوشات بداية بالسيدة برجيت بردوا وحملتها ضدد وحشية اولاد العرب وهمجيتهم مع الخرفان الى يا حرام بتتعذب لمابتتدبح بطريقة وحشية وتبداء المسيرات السلمية والمظاهرات منددين بوحشية اولاد العرب الى وصلنا الى السنة دة الى منعت العظيمة استراليا فيها تصدير الخراف الى مصر لية علشان احنا اشرار بنعامل حيوانتها بطريقة وحشة جدا المفروض اننا ندلعهم ونيمهم جنبنا ونطبطب عليهم اما والله غريبة هو فية اية هما مش لاقين شى يتلكوكولنا بية اية بقى الطريقة الى بنعذب بيها الحيوان اننا بنذبة بطريقة شرعية مش بالصدمة الكهربية زى مهما بيعملوا ان ربنا امرنا اننا نكون السكين حامية علشان الحيوان مش يتعذب ان ربنا امرنا الا يذبح حيوان امام حيوان اخر طريقتنا الشرعية مش عجباهم طيب ياريت هما يعاملوا البنى ادم فى جوانتناموا والعراق وفلسطين ربع همجيتنا احنا مع الحيوان دة لو كنا همجيين انا مع حظر استراليا تصدير الحيوانات الينا ولكن ليس لسبب اننا همجيين ولكن لانى لا اقبل ان اكل لحم رباة همجيين وارجع واقول ان المشكلة مش فيهم لا فينا لان بداخلنا من يدافع عن وجهة نظرهم فوجئت فى احدى قنواتنا المصرية احدى المدافعات عن حقوق الحيوان تساند وجهة نظرهم وكان الانسان فى بلدنا اخذ كل حقوقة ومبقاش فاضل غير حقوق الحيوان والغلطة الاكبر اننا وضعنا ايدينا تحت اسنان هؤلاء ومجبرين للاستيراد منهم يناس هو تربية الخرفان والحيوانات صعبة قوى يعنى محتاجة خبير اجنبى لو محتاجة نجيب خبير اجنبى من احدى القرى المصرية يمكن يربى شوية خرفان نغيظ بيها الخرفان الاسترالية ارحمنا يارب
وكل سنة وانتم بالف خير ونصيحة بجد مش تكلوا لحمة كتير علشان الصحة يعنى
لا تنسوا اليتيم فى العيد

الجمعة، ٣٠ نوفمبر ٢٠٠٧

عمرو دياب وتامر حسنى

والله العظيم زهقت
هو يا ناس مبقاش فية خلاص غير الاستاذ عمرو دياب وساحر العبيطات ( عزرا للفظ) تامر بية حسنى
هو محور كلام البنات لدرجة ان ممكن اتنين اصحاب يتخانقوا بسببهم مش ممكن الهيافة توصل لحد كدة وعزرا مرة اخرى للفظ
الموقف بداء فى المنى باص راجعة انا من الجامعة مقتولة ونفسى اغمض عينى شوية لحد موصول ومش اسمع اى شى
الا ان الكلام شدنى والله انا مش بحب اسمع حورات الناس فى المواصلات بس هما كان صوتهم عالى والموضوع شدنى
حوالى خمس بنات فى الجامعة راجعين من محاضرات مرهقة طول اليوم تتخيوا ممكن يكون حوارهم اية
بداء ان واحدة بتقول بقى عمرو دياب ياخد الاورد
وطبعا انا مكنتش فاهمة يعنى اية الاورد بس الى فهمتة من كلامهم انها جايزة ولما بحثت فى الموضوع بعد كدة عرفت انها جايزة عالمية طيب يا جماعة خير وبركة انتى زعلانة لية بقى
المفروض ان الى كان ياخدها تامر حسنى طيب معلشى اية المشكلة ياخدها المرة الجاية ردت واحدة تانية اية تامر دة الى ياخد الاورد
التالتة لا طبعا عمرو احق اية تامر دة ردت الاولى لا دة عمرو اكيد بيدفع علشان تامر مش ياخد الجايزة ياناس وهنا اشتد الموقف سخونة وبدات المناقشة تاخد طريقها الى شكل الخناقة
انتى اصلك مش بتفهمى فى الغنا والطرب ( طرب ) ما علينا
وتتطور الموقف الى عمرو بيغير من تامر اية تامر دة الى عمرو يبصلة
انتى مش بتفهمى انتى الى مجنونة عمر
ربنا ياخد دة ودة انا الى بقول فى نفسى طبعا انا اقدر انطق كانوا الكل وقتها اتفق عليا انا المهم لم ينتهى الموقف غير لما واحدة قررت انها تنزل من المنى باص لانها مش ممكن تقعد مع واحدة من مشجعى تامر فى منى باص واحد
تخيلاوا التفاهة يا ناس
اية تامر واية عمرو الى ممكن نتخانق عليهم
الله يرحمك يا حليم

انا لست من مستمعى عمرو ولا تامر بس الى لفت نظرى بعدها بكام يوم ان لاقيت تامر بيغنى فى حفلة يحضررها السيد الرئيس وعن حرب اكتوبر اية مين وطنى متهرب الجيش بيغنى وطنى
يارب يرحم وطنى من التفاهة ومن التهرب من خدمتة ومن البنات الهايفة
وبجد الله يرحمك يا حليم ويا فوزى ويا فريد

الجمعة، ٢٦ أكتوبر ٢٠٠٧

وحشتونى


وحشتونى جدا جدا جدا جدا

ياة اول اسبوع مرة فى الكلية متتخيلوش الهلاك الى انا فية دراسة وشغل شى صعب بجد

الى نفسى بجد احكيهلكم معاناتى مش مع التعب لا
مع نظام التعليم فى مصر تخيلوا تبقى

طالب دراسات عليا والدكتور يفرض عليك كتاب ولازم تشترية لان فية شيت هتسلمة

للدكتور تخيلوا ان دة يحصل فى درسات عليا يعنى المفروض انك تبحث ودور والدكتور

ما علية غير انة يحدد رئس الموضوع الى هتدرسة وانت تتولى الباقى
وتخيلوا بقى لما

يكون الدكتور بقى كبير فى السن والله انا بحترم كل كبار السن جدا بس دكتور فوق

السبعين هيدرس اية جديد وكمان ملوش خلق حتى يتكلم ولا يتعامل مع طلبة والله دة شى

طبيعى فى سنة مش عيب فية واحنا بكرة نكبر ونبقى كدة برضة دة تطور طبيعى للسن

والله الدكتور الكبير دة على عينى وراسى بس المفروض انة يرسم سياسات عامة

للدراسة او انة يدرب الدكاترة والمعيدين مش يتعامل مع طلبة

المهم انتم وحشتونى بجد

وشكرا لكل الى زارنى وسال عنى
اسيبكم بقى لانى عندى بحث مهم لازم اخلصة

سلام

الاثنين، ١٥ أكتوبر ٢٠٠٧

عدنا الى قواعدنا


خلص رمضان بكل روحانياتة وجمالة وخلص العيد ببهجتة وفرحتة ورجعنا تانى للشغل بقى بعد اجازة العيد
انا شخصيا محتاجة ارجع لشغل وللدراسة الى هتبداء تنتظم بعد العيد وهرجع للمحاضرات والمذاكرة تانى ادعولى السنة دة صعبة قوى
ادعولى الدراسة تشغلنى وتاخد وقتى كلة لانى محتاجة مبقاش فاضية يعنى الفراغ بيبقى صعب

يلا هغيب عنكم شوية علشان محاضراتى هتبقى بعد الضهر ياريت تبقوا تسالوا عنى

هتوحشونى

الخميس، ١١ أكتوبر ٢٠٠٧

كل سنة انتم بالف خير

عيد باية حال عدت يا عيد



وعلى راى صفاء ابو السعود العيد فرحة وانا شخصيا مازلت احتفظ بفرحة زمان فى العيد واجيب لبس جديد

واجيب بلوانات مش لية لا لاولاد اختى بس بلعب معاهم برضة كل سنة وانتم بالف خير


وياريب يكون عيد سعيد عليكم كلكم ونصيحة بلاش كحك كتير يعنى واحدة فى اليوم


كفاية

وكل سنة وانتم بالف خير

بعد ازنكم بقى هقوم علشان اجهز لبس العيد


الجمعة، ٥ أكتوبر ٢٠٠٧

عاش الى قال

تحية اعزاز وتقدير اليك

عاش عاش
عاش
عاش
الى قال
عاش الى قال
الكلمة بحكمة فى الوقت المناسب
عاش عاش عاش
الى قال
لازم نرجع ارضنا من كل غاصب
عاش عاش

عاش العرب الى فى ليلة اصبحوا ملاين تحارب
عاش الى قال للرجال عدوا القنال
عاش الى حول صبرنا حرب
عاش الى قال يا مصرنا مفيش محال



عاش
بجد
راجل عظيم برغم اختلاف الجميع حولة الا انى ارى انة لم ياخذ حقة كما ينبغى لة لم يمهلة القدر ليحيا ويرى حصاد ما زرعة ولا ان يجنى ثمار نجاحة كلمة حق لابد ان اقولها فى حق رجل من اعظم رجال مصر احبها واحبتة ووهبها نصر عظيم وكرامة للابد ارجو ان تتذكروة بقراءة فاتحة على روحة فذلك اقل ما يمكن ان نقدمة لرجل الحرب والسلام العظيم محمد انور السادات فلو كنت ارتدى الزى العسكرى لقدمت التحية العسكرية لذلك الرجل
رحمة الله

الجمعة، ٢٨ سبتمبر ٢٠٠٧

تاج تاج


تاج جديد من العزيز محمد سمير صاحب مدونة غمض عنيك جالى ومعاة طبق قمر الدين بالممكسرات مقدرشى مش اكللة مع انى عاملة رجيم شكرا محمد
وادى الاجابات


لو قالولك اختار عصر من عصور مصرعلشان تعيش فيه تختار اى ‏عصر و فى عهد اى حاكم .. واشمعنى؟


اختار اعيش فى العصر الفاطمى ايام قطر الندى واعيش فرحها الاسطورى او اكون فى ايام الخيدوى اسماعيل واعيش افتتاح الاوبرا واشوف نهضمة مصر المعمارية والثقافية وقتها

اول ‏اولويه فى حياتك عيلتك ولا شغلك ولا اصحابك؟

عيلتى اكيد


ايه اكتر ‏حاجه بتحبها فى رمضان؟

الليل بحس انة ليل غريب عن وقت فى السنة تحس فية بروحانية واحساس كدة معرفشى اوصفة شكل السماء بيبقى غريب كانها منورة سبحان الله

اوصف ليا ‏اجمل فطار ممكن تفطره

اجمل فطار كان زمان لما كانت عيلتنا الصغيرة كاملة والدى رحمة الله واختى قبل متتجوز واحنا بنفطر ونسمع مسلسل الشرق الاوسط وبابا يهظر معيا كل يوم يسالنى هية التمثلية دة اسمهااية

لو انت ‏حاكم على مجموعه من الافراد هتكون عادل؟؟ طب هتعمل ايه عشان تتأكد انك حاكم ‏عادل؟

بصراحة سوال صعب قوى مفهوم العدل دة اصلة مختلف من شخص لشخص تانى تبع تفكيرة بس انا اعتقد انى هعمل فريق عمل لكل واحد اختصاص وفى اخر كل مدة محددة هنشوف مين ادى واجبة ومين قصر وباجماع الجميع هنقرر الثواب والعقاب

اللى بيبوظ الحكام .. نفسهم؟ ولا الشعب؟ ‏ولا الحاشيه المقربه؟

الحاشية المقربة والشعب
الحاشية بانها بتخفى عنة اى شى غلط ممكن يحصل
والشعب الى مبيحاولشى يوصلة صوتة باى

مين ‏أكتر اعلامي مصري بتحترمه؟

تامر امين


قريت ديوان عمر مصطفى صاحب بلوج تجربه " اسباب وجيهه للفرح" ‏عن دار ملامح و لا لسه ؟؟

لا

لو ‏ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ‏ايه؟

راقصة بالية

ايه تانى بلد تتمنى تعيش فيها بعد ‏مصر؟

برضة مصر
لو خرجت منها اموت

اوصف ليا ‏ترتيبات اجمل فرح ممكن تحضره

اقولك اولا تكون زفة العروسة على هودج ويكون العريس الى ماسك الجمل وبعد كدة ينزلها من الهودج دة والزفة تكون على المزمار البلدى لحد القاعة وبعد كدة بقى فرح عادى

بتراعي ‏كلام الناس والقيل والقال؟ لو اه او لو لا قول لى ‏ليه؟


طبعا محدش يقدر يتجاهل الناس لانة مش عايش لوحدة بس لو الى هعملة مش ضدد الدين يبقى ميهمنيش الناس


صحيت من النوم ما لقيتش الموبايل ولا الكمبيوتر ولا ‏الكاميرا الديجيتال
ولقيتنا ‏رجعنا لعصر الحمام الزاجل والحصنه هتكون سعيد؟
اكيد هكون سعيدة وجدا كمان مش بقولك انا عايزة ارجع لايام قطر الندى وياريت اكون انا هية

السعاده ‏هى؟

الساعدة كلمة كبيرة قوى وصعب وصفها بتختلف من شخص لاخر انا بالنسبة ليا ضحكة طفل فى وشى اكبر سعادة


عندك أمل ‏؟؟ أسبابك


الحمد لله عندى امل لان ربنا موجود

لما تحب ‏تهرب من كل شئ بتروح فين؟

الشباك ابص للسماء

امتى ‏أول مره خدت فيها نفس طويل كده وقلت بينك وبين نفسك يااااه الظاهر انا فعلا ‏كبرت؟


لما لاقيت ابن اختى الى لسة كنت بشيلة مشاء الله كببر وبقى فى تانية ابتدائى

لما ‏بتعمل عمل خيرى بيكون ايه هو دافعك الاول؟


اكيد رضاء ربنا وبعد كدة اسعاد غيرى


بتشرب ‏سجاير؟ لو الاجابه اه ايه شعورك لو شفت ست بتشرب سجاير؟ وليه ‏؟


لا مش بدخن بص موضوع التدخين بالنسبة ليبا سواء ست او راجل مش بحب شكل السيجارة فى ايد اى حد منهم


بتعرف ‏ايدك اليمين من الشمال ازاي؟


الى بسلم بيها تبقى اليمين



ايه اكتر ‏اله موسيقيه بتحبها ؟ ؟


العود والناى


فى رأيك ليه الذوق والنخوه ‏اتعدموا؟

ما يسموة بعصر السرعة



ايه ‏الحاجه اللى لو حصلتلك تبقى سعيد قوى؟؟؟


ياةةةةةةةةةةةةةةةةةةةةةةةةةةةةةةةةةةةةة كتير بس بجد ببقى سعيدة قوى وانا واخدة اولاد اختى وبلعب معاهم



تختار ‏يبقى عندك...ارض زراعيه ولا اجنس عربيات و لا كام عماره و لا فلوس فى ‏البنك؟؟؟؟
ارض زراعية وازرعها كلها ورد


البحر و ‏لا النيل؟؟؟


البحر
حبيبى قالى اتمنى انا قولت بيت على البحر فرد قلوعة وخدنى بصيت لاقيت البحر


مركب و ‏لا طياره؟؟


مركب طبعا


مجنون و لا ‏عاقل؟؟


مجنون


تقرأ ‏كتاب و لا تتفرج عليه فيلم؟


اقراء كتاب

امررة لمين لمين لمين

د / اياد هيثم حرفوش
احمد صاحب مدونة الله الوطن المدونة

علياء صاحبة مدونة فتاة من القلب

رمضان كريم




السبت، ٢٢ سبتمبر ٢٠٠٧

مجدستان

مجدستان
عايز تعرف فين مجدستان عايز تعرف اخبارها وحياة شعبها وكل حاجة عنها
روح دلوقتى بسرعة الى مجد ستان
تيجوا نروح الرحلة دة يلا جهزوا شنطكم
ورحوا الطيارة فى الانتظار
الى مجدستان

الثلاثاء، ١١ سبتمبر ٢٠٠٧

احلى ما فى رمضان










رمضان كريم وكل سنة وكل الدنيا بالف خير يارب




عارفين احلى ما فى رمضان اية طبعا بعد انة شهر الروحانيات والصوم والتقرب الى الله





احلى ما فية حجات كتير مبنعملهاش غير فية لمة العيلة لان كل العيلة بتتلم فى وقت واحد للفطار والسحور مش فى الايام العادية الى فقدنا فيها اللمة دة كل واحد وقت مبيجى البيت بياكل لوحدة





غير كدة الزيارات وعزومات الفطار امر برضة بنفتقدة فى الايام العادية وكل فين وفين لما بنفكر نزور حد من قرايبنا





فانوس رمضان الى بجد لحد دلوقتى بفرح جدا لما بيجيلى فانوس جديد وبالرغم من وفاة والدى الا ان امى ربنا يخليها ليا بتصر انها تجيبلى فانوس انا واولاد اختى كل سنة





واحلى حاجة بقى كنت بحبها بس للاسف اختفت من كتير من شورعنا زينة رمضان الى كنا بنعملها بايدنا وبورق ملون وكنا نعلقها فى البلكونات مع الفانوس مش عارفة لية اختفت العادة دة لية مش ام تحاول انها تجيب ورق ملون وصمغ وخيط وتعلم ورالدها يعملوا زينة رمضان بنفسهم ويعلقوها فى البلكونات اكيد هيفرحوا جدا وهيحسوا برمضان اكتر وتبقى كل شوارعنا فيها فرحة رمضان





ياريت بجد نحافظ على عادتنا الجميلة دة ومش نغيرها ولا ننساها وياريت كمان فانوسنا يرجع زى الاول الفانوس الجميل مش البلاستك الصينى الى بيغنى الى مش بحس فية بفرحة رمضان ابدا





يارب اعد رمضان علينا بالخير والبركة





سبحة رمضان لولى ومرجان بثلاثة وثلاثين حباية



ثلاثة وثالاثين



منهم ثلاثين ايام رمضان نور وهداية



وثلاثة العيد ونقول ونعيد



ذكر الرحمن اية باية



سبحة رمضان رحمة وغفران ورضاء الرحمن وحدة كفاية



كل سنة وانتم بالف خير





الخميس، ٦ سبتمبر ٢٠٠٧

انقذوا عقلى

من كام يوم كنت فى زيارة لصديقتى وطبعا فوجئنا باخوها وضيف جاى معاة طبعا صديقتى وانا دخلنا لانها منتقبة ومينفعشى تقعد مع الضيف وبعد شوية دخل اخوها وقالها تحضر نفسها وتيجى تسلم على الضيف وانة صديقة طبعا مش هتسيبنى لوحدى ورفضت انى امشى وخرجت قعدت معها وكان ما كان
بعد طبعا السلامات والتحيات وطبعا الى لا اخوها ولا الضيف كانوا طايقنى فى القعدة ودة حسيتة من اول لحظة وكل مستاذن تقولى لا اقعدى طبعا انا عندى دم وحاسة انى مش مطاقة فى القعدة بس هية ماسة فيا بشكل هستيرى غريب وبدا الكلام واخونا دة عمال يعرف نفسة ويتكلم عن نفسة واطبعا منسيش يقول فى وسط الكلام على انة بيدور على بنت الحلال الى تعينة فى تحمل الحياة وشئون الدعوة وطبعا كل دة انا ساكتة يعنى محبش احشر نفسى فى كلام مليش فية انا قاعدة مجاملة الا وقال كلمة خرجتنى عن صمتى وهية انة طبعا ملتزم وبيحب تطبيق شرع الله وان شاء الله طالب التعدد وان زوجتة موافقة على دة
انسحبت انا من لسانى وقولتة هو مفيش فى شرع ربنا حاجة ناقصة حضرتك مطبقتهاش غير التعدد
طبعا رد عليا بعد شوية وقال
اولا انا لا اطلب حاجة غير شرعية
ثانيا التعدد من الشريعة الاسلامية
والتى ترفض التعدد ولا تقبلة فى لا تقبل جزء من شرع
الله
الموضوع بقى سخن فى دماغى

هو لما ارفض انى اكون زوجة تانية او ارفض زوجى يتزوج عليا ابقى خرجت عن شرع الله ورفضتة

قالى ايوة

قولتلة ازاى اذا كان النبى صلى الله علية وسلم رفض ان احدى بناتة تكون ليها ضرة

قالى بس النبى تزوج اكتر من مرة
قولتلة دة كان بامر من السماء وكل زيجة لها ظروفها


بداء يتعصب ويقولى الاية القرانية واضحة وسيدنا الحسن كان مزواج

انا قولت وربنا قال ولن تعدلوا بين النساء ولو حرصتم


وقال نص صريح ولن تعدلوا

بصيت لاقيتة بيقولى كلمة غريبة

المشكلة يا اختى الكريمة ان الملتزمين اصبحو يفكرو بتفكير المجتمع والعوام



قولتلة هو المجتمع والعوام مش مسلمين يعنى ولا اية

نعم طبعا فى فرق فى التفكير والالتزام والادب والحركة والانفعال وصلة الرحم واداء الحقوق والالتزام بالواجبات واخذ النفس بالجد وترك الهزل والتزام الحق والبعد عن الظلم

كل دى فروق بين الملتزم والانسان العادى الذى لا يعنية غير نفسة وهواها

يعنى حضرتك بس الى تقدر تفرق بين الملتزم والعادى
قالى طبعا
الملتزم هو الى يجبر نفسة على فعل الشى حتى ولو خالف هواها

يا سيدى الفاضل حضرتك عملت كل شى واديت كل حقوق الله والتزمت بكل الاوامر والنواهى وكل الى فاضل بس التعدد

لاقيتة بصلى بنظرة غريبة ولاول مرة يبصلى من ساعة بداية الكلام

وقال لاخو صاحبتى نكمل بقى الى كنا جاينلة مرة تانية

ومشى
الى فهمتة بعد كدة ان الاستاذ كان عريس وجاى لصحبتى وانا بغبائى طفشتة منها مهو طبعا مش هيقبل يتجوزها وليها صديقة من الناس العادية مش الملتزمة
علما بان ما بينى وبين ربى بينى وبينة فقط ولا يهم اى احد من البشر ان يعلمة
المشكلة بقى ان صاحبتى مكلمتنيش من وقتها تفتكروا حصلها اية ولا قاطعتنى
يارتنى متكلمت هو لسانى دة الى مودينى فى داهية

السبت، ١ سبتمبر ٢٠٠٧

اتولدت النهارضة

ميلاد طفلة جديدة لاحدى صديقاتى وشكلها وهية بتبصلى اوحالى بالموضوع دة
وبفكر انى اكمل يوميات طفلة اية رايكم اكمل ولالا


انا اتولدت النهارة

ازيكم يا عموا ويا طنط

انا اتولدت النهارضة اية دة هية الدنيا بتاعتكم كبيرة قوى كدة لية انا كنت فى دنيا صغيورة على قدى اية دة واية كل الناس دة ومالهم بيبصولى كدة لية اية ومالهم شكلهم غريب قوى كدة لية هما كبار قوى لية كدة الله واية الدوشة دة انا كنت مرتاحة مكنتش بسمع غير صوت جميل عمال يقول تك تك تك برضة بيبصولى هما مالهم مستغربين كدة لية انتم الى شكلكم غريب قوى وبجد لو مش بطلتوا تبصولى كدة هعيط اية دة هما مالهم هيعملوا فيا اية اية دة بتحطوا عليا اية سيبوا ايدى بتعملوا اية واية الى انتم حطتوة عليا دة انا محدش حط عليا حاجة قبل كدة صحيح انتم عندك برد غير الى كان فى دنيتى هو انا اية الى جابنى عندكم اية دة الى بتحطوة فى بقى دة مش عايز حاجة كدة اية انا سامع واحدة بتقول حط فى بقى التيتينة علشان تبطل عياط ابعدوا انتم عنى وانا ابطل عياط كل واحد عمال يشيل فيا شوية ويبوسنى انا زهقت مين دة انا سامعة كلمة بابا واحد غريب كدة بيقولى انا بابايعنى اية بابا دة اقولكم انا زهقت من بحلقتكم فيا انا هنام

سلام

الاثنين، ٢٧ أغسطس ٢٠٠٧

دعونا نتحد

موضوع بجد مهم ارجوا الدخول للاهمية فى مدونة د / اياد
للفجر نغرد
ارجوكم للاهمية
ارجوا قرائة الموضوع بشكل متفهم
اكرر موضوع مهم

http://eharfoush.blogspot.com/

الجمعة، ٢٤ أغسطس ٢٠٠٧

http://do-to-alakher7.blogspot.com/


مدونة جديدة للصديقة علياء تستحق الزيارة
اتمنى ان تستفيدوا منها لانها لخير الدنيا والاخرة
اسمها اعمل لاخرتك
جزاها الله واياكم الخير
مستنياكم هناك

الثلاثاء، ٢١ أغسطس ٢٠٠٧

انصحونى

هو الناس اتغيرت ولا انا الى لسة عايشة فى زمن قديم سعات كتير بحس انى زى الى خارجة من فيلم قديم ابيض واسود لما بشوف الناس بتتعامل مع بعضها ازاى دلوقتى بستغرب هو اية الى حصل محدش بيقى مستحمل حد ولا حد بيقبل نصيحة من حد ولا حد اصلا بقى ينصح حد مين الى غلط انا ولا الناس انا مريت بموقف النهارضة احبطنى بنصح زميلة ولاقيتها بمنتهى البرود بترد عليا وتقولى انتى مالك والغريبة موقف الناس انهم بيلمونى انا ويقلولى متسيبها حتى لو راحت فى داهية انتى صحيح مالك متخليكى فى حالك انا الى غلط اعمل اية بس مش عارفة ابطل لو شفت شى فى قدرتى اعملة لحد اوانصحة بيبية انا مش بشكر فى نفسى ولا اقول انى مثالية بس بجد دة طبعى بحب انى لو فى استطاعتى اساعد اى حد يبقى لازم اساعدة من فرج على مؤمن كربة فرج الله عنة كربة من كرب يوم القيامة مش عارفة اتغير ومش عارفة اتعامل الناس
دلوقتى اعمل اية

الثلاثاء، ٧ أغسطس ٢٠٠٧

المدون لما يسعد



المدون لما يسعد يجيلة تاجين مرة واحدة


او على راى العزيز اسكندرانى اوى موسم التاجات وانا جالى تاج تانى من العزيز


سمير صاحب مدونة غمض عينك


هيحصل أيه لمدونتك لما تموت ؟؟


والله مش عارفة مفكرتش فى الموضوع دة قبل كدة بس ممكن ادى حد الباس ورد يكمل بعدى


أديت الباسوورد لحد قبل كده ‏؟

كانت أيه طبيعه علاقتك ‏بيه؟



لا


أسمك؟


اية ريحان


المشهور بيه وسط أصحابك؟


ايوية


عمرك؟


ولية الاحراج بقى

30



دراستك ؟؟ مجالك ‏؟؟


ليسانس اداب علم نفس

اخصائية نفسية



شخصيتك نوعها ايه؟


شخصية عادية هادئة واميل للهدوء بشكل كبير وابعد عن الدوشة


السفر بالنسبه لك ؟


تعرف على ناس واماكن جديدة



وقت ‏فراغك بتعمل ايه ؟


القراءة والكمبيوتر



المود بتاعك؟


يعنى بحب الهدوء



الأكله المفضله


المكرونة بالبشاميل


الصفات التى أخذتها من بابا ؟


لا تاجل عمل اليوم الى الغد



الصفات التى ‏أخذتها من ماما ؟


الهدوء


أكتر ست حاجات بتكرهها ؟



استغلال النفوذ

عدم احترام المواعيد

الظلم

الغباء والاستغباء

البسلة

محشى الكوسة



أكتر ست حاجات بحبها ؟


الزرع

البحر

شبرا

الملوخية

الفراخ

الاطفال


الشغل بالنسبه ‏لك؟


اكيد جزء من حياتى بصراحة مش المهم قوى فيها بس جزء منها مقدرشى استغنى عنة


الأنترنت بالنسبه لك ‏؟


شى مهم بجد فى حياتى



امررة لعلياء واحمد تكملة للتاج السابق


وشكرا محمد سمير للتاج






الاثنين، ٦ أغسطس ٢٠٠٧

تاج من د/ اياد


اسم مدونتك



مذكرات شابة


ولى مدونة بعنوان حياتى فى سعادة الاخرين


والبيت بيتك


لماذا اخترته؟..وماهى نيتك من وراء



والله مذكرات شابة لانى بكتب فيها يومياتى

اما الاسمين الاخرين فهما مناسبين لمضمون كل مدونة


هل فكرت فى اغلاق مدونتك؟...وما السبب


مرة عندما كتبت موضوع عن عقوق ابن لامة ولانى حسيت انى مهما حاولت بجهودى البسيطة ارجع الناس تفتكر الحب فى مدونتى حياتى فى سعادة الاخرين قدام كل هذا الجحود مش هينفع واكتابت


ة رابط الموضوع


صورتك فى المدونه...ورمزيتها


الحقيقة مليش صورة فى المدونة بس لو حطيط اكيد هتكون صورة لطفل لاحساسى ان الطفلة الى جوايا مش عايزة تكبر




لم دخلت عالم التدوين من الأساس


مجرد صدفة كنت اتابع مدونة الاستاذ خالد الصاوى وعجبتنى فكرة المدونات وحبيت اتعرف منها على افكار الناس



جمله قيلت لك فى وصف مدونتك


مجرد انها مدونة جميلة

ودة اسعدنى



التعليقات بالنبسة لك...ما أهميتها


طبعا مهمة جدا وبدونها بجد بزعل النها بتحسسنى باهمية ما اكتبة


أحلى بوست كتبته...ضع اللينك ثم اذكر لماذ


احلى بوست كان عن صديقين فى مستشفى

وقصة اتمنى تقرائوها وبعتبرة كدة لانة عبر بصدق عن ما كنت اريدة من مدونتى حياتى فى سعادة الاخرين




أفضل مدونه قرأتها


كتير مدونة الدكتور اياد مدونة

مدونة فتاة فى القلب

مدونة الله الوطن المدونة

مدونة كارتونيا

عالم تامر

وكتير هتلاقونى حاطاهم فى لنكات على مدونتى باسم اماكن فى القلب



حد قل أدبه فى التعليق..ايه رد فعلك؟؟


لحد دلوقتى محصلشى ببس لو حصل هيكون تجاهل



أسوأ مدونة


لم اقابل



أسوأ بوست؟...أسوأ مدون


لم اقابل




انت سعيد؟


الاحساس بالسعادة نسبى ومش ممكن هتكون سعيد على طول او حزين على طول

لكن الحمد لله على كل حال


لو اجتمعت انت وحسنى مبارك فى غرفه واحده



هقولة كلمة واحدة اين الوعى السايسى لدى الشباب وبجد مش كلام جرايد فين اهتمام الاحزاب بالشباب


لو معاك مليون ونص مليون هاتعمل بيهم ايه


والله لو حد يعوز ياخد منهم نصف مليون يقولى اما المليون الباقى بعد طبعا ميطلع لوجة الله جزء الباقى احقق حلم امى بالحج واسافر معها

وبعد كدة ابنى بيت فى العريش على البحر وازرع حوالية جنينة وارتاح بقى بالهدوء وببلدنا الجميلة



بتحب البنات


دة سوال لللاولاد


مسلم


الحمد لله بلا افراط او تفريط


من أكتر شخصيه ماتقدرش تستغنى عنها وليه؟؟



امى طبعا ومن غير لية




ايه أكتر موقف محرج اتعرضت ليه فى حياتك؟..واتصرفت ازاى؟؟

مفتكرشى شى يعنى اثر لدرجة انى افتكرة



ايه الأمنيه اللى بتدعى ربنا دايما انه يحققهالك


ربنا يهدى كل الناس ويحببهم فى بعض وعن امنيتى الشخصية قوى ربنا ينجحنى السنة دة فى الدبلومة


امررة لمين لمين لمين


حبيبتى علياء صاحبة مدونة فتاة فى القلب


واحمد صاحب مدونة الله الوطن المدونة








الجمعة، ٢٠ يوليو ٢٠٠٧

بلدنا امانة فى ايدينا




مشربتش من نيلها
جربت تغنيلها
جربت فى عز متحزن تمشى فى شوارعها وتشكيلها
ممشتشى فى ضواحيها
طيب مكبرتش فيها
ولا ليك صورة على الرملة كانت على الشط فى موانيها
دور جوالك تلاقها هية الصحبة وهية الاهل
عشرة بلدى نسينها على البال مش سهل
جايز ناسى لانك فيها مش واحشاك ولا غبت عليها
بس اسالوا عنها الى فارقها قال فى الدنيا مفيش بعديها


مع طوفان الاغانى الوطنية الى مش لاقية اى مبرر ليها الا ان هذة الاغنية وحدها شدتنى ولفتت نظرى ان اسمعها مش لانى بحب شرين لكن الن شرين متوظفة فى خدمة الاغنية بنوتة مصرية ذات ملامح مصرية قوى بنت بلد بجد كانت بسيطة فى لبسها مكياجها حتى مشهد الكحك ولمة العيلة فى عميلة كانت مصرية بجد الكلمات مفيهاش الكلام الكبير زى بنحبك يا مصر ولا اى شى ولا اطفال كتير لابسة ابيض معرفشى لازمتهم اية فى الاغنية واية الحكمة من الابيض يمكن انا مش بفهم المهم خلينا فى اغنيتنا لاقيتها خالية من اى تعقيد بسيطة فى كل شى فعلا مين فينا مفيش مكان فى مصر مبيفتكرشى فغية ذكريات جميلة او حزينة مين فينا مزعلشى مرة ونزل اشتكى همة للنيل او البحر فى الموانى او حتى شط الترعة فى الريف مين فينا يقدر يشيل حب البلد دة من جواة فعلا يمكن لاننا فيها مش حسين اننا بنحبها بس لو بعدنا او حصلها حاجة تلاقينا ملهفوين قوى عليها وعلى اخبارها واكلها وكل شى فيها فعلا بلدنا امانة فى ادينا ياريت ميبقاش بالاغانى بس نحاول ندور كدة جوانا هنلاقينا بنحب البلد دة قوى وعايزنها تكبر اكتر واكتر هى ام الدنيا الى لسة شابة تسمحولى اسيبكم واعيد الاغنية تانى

اة صحيح نسيت
بعيدا عن اى شعارات مستهلكة بعيدا عن اى رياء او نفاق
ولانى لست غير ابنة هذة البلد
ولانى مش فى التليفزيون ولا بعمل حديث تليفزيونى وبقول فية انا بحب مصر زى مكون بسمع كلام حافظاة انا فخورة انى ابنة هذة البلد مش عارفة انا كتبت كل الكلام دة لية بس حسيت انى عايزة اقولة الى كل مصرى ومصرية اعتز بكونك ابن هذة البلد وافخر بذلك مهما كانت سلبياتها محدش بيغير امة ولا بيشمئز منها مهما كبرت وكذلك محدش بيغير بلدة بلدنا امانة فى ايدينا

الأحد، ٨ يوليو ٢٠٠٧

صباح الخير يا امريكا

لانى بصحى بدرى من طبعى حتى يوم الاجازة فقد كنت من المتابعين لبرنامج صباح الخير امريكا او صباح الخير يا مصر سابقا

انا مش ضدد التطوير انما البرنامج بقى بصراحة مسخ وبقى اسفاف مش تطوير فوجئت بان البرنامج اصبح يخلو ا من مذيعات ومذيعين الاخبار الا فيما ندر واصبح ملئ بمذيعين من قنوات المنوعات والاسرة والطفل مع ان البرنامج تابع لقطاع الاخبار تحول البرنامح الى برنامج منوعات يقدم فية نشرة اخبار وتحليلات سياسية على استحياء ناهيك عن الميعات الاجانب فى شكل مصر لا يحملوا من مصريتهم سواء خانة مصرية فى البطاقة الشكل اجنبى واللهجة اجنبية اية دة ياربى انا بتفرؤج على تليفزيون امريكا ولا مصر المذيعة الامورة مش عارفة ترجمة فيرنتشر تبقى اية بالعربى وخد من دة كتير ولا بقى المذيع الظريف الى فاكر نفسة رايح الجنينة وبيلبس بنطلونات مقلمة ومشجرة و تش شرتات والله انا حاسة انها بتاعة اختة وشياكة تقولشى شعبان عبد الرحيم ولا المذيعات ولبسهم ولا الى الى واخدة لبس بنتها او اختها الصغيرة انا مش ضدد ان البرنامج يكون لطيف الصبح لان الناس لسة صاحية وراحة شغلها صحيح انا كنت سعات بزهق من كتر الاخبار الكتيرة والتحليلات السياسيةة الى مش مناسبة لفترة الصبح
لكن البرنامج بقى بجد مستفز اكتر من الاول والله فية برامج ممكن تكون خفيفة وفى نفس الوقت ملتزمة شوية وفية مذيعين ومذيعات اخبار دمهم لطيف برضة بس وقوريين شوية مش مسفيين قوى كدة البرنامج تحول الى برنامج منوعات تتخللة نشرة
ياريت يرجع زى مكان بجد عيب قوى اننا نصبح على مصر بالاسفاف دة

السبت، ٣٠ يونيو ٢٠٠٧

مشكلة صديقة




الحقيقة واحدة صحبتى جدا ويمكن اكتر تعتبر توامى ميمرش يوم غير منتكلم اكتر من مرة عندها مشكلة وطالبة رايكم فيها هية طلبت منى دة لانها عايزة تعرف راى اصدقائى المدونين

مشكلتها تتلخص فى الاتى صديقتى دة منتقبة بغض النظر عن مدى موافقتى للنقاب او لا انا متقبلها زى مهى كدة ليها فكرها وانا ليا فكرى فى الموضوع دة بالذات ولا هيى قى يوم قالتلى اتنقبى ولا انا قولتلها انتى لابسة النقاب لية مشكلتها انها كل محد يجيبلها عريس يقول انة صعب علية يدخل البيت من غير ميكلمها الاول ويتعرف عليها برة البيت ولو مرة واحدة لان دخول البيوت مش سهل وانة ميحبش يدخل البيت ووميحصلشى نصيب وتبقى احراج لية وليها لكن هية بترفض حتى فكرة انها تتكلم فى التليفون مع اى حد عريس اقصد ودة بيتسبب ان كتير منهم بيمشوا والموضوع مش بيكمل طبعا العريس دة مش بيكون طالب القاء فى الشارع لكن مثلا فى مكان شغلها او عند قريبة او فى مكان عام وان وبعض منهم طلب ان يكون معها اخوها او اى صديقة ليها والطلب دة فعلا متكرر كتير هية سالتنى وبصراحة انا مش عارفة ارد عليها لانى مش عارفة هل فعلا صح او غلط انها تتكلم مع واحد طيب ولو نفرض ان اخوها رفض الكلام مع اى حد عن طريقها لانة ولى امرها تتكلم من وراة طيب تقول الى بتكلمة متقولشى لاخويا انى كلمتك انا مش عارفة ارد عليها فية اى حل عندكم ليها هية بجد محتارة وانا اكثر حيرة منها

الأربعاء، ٢٧ يونيو ٢٠٠٧

عايزة حل

انا شاب لكن عمرى ولا الف عام


وحيد ولكن بين ضلوعى زحام
خايف


ولكن خوفى منى انا


اخرس


ولكن قلبى مليان كلام


من العصب جدا على الانسان انة يكون وحيد بالرغم مَن وجود ناس كتير حوالية والاصعب انة يكون جواة كلام كتير بس مش قادر يقولة والاصعب انة يكون خايف بس من نفسة ممكن الانسان يخاف من نفسة يحس ان هو الى هياذى نفسة الخوف والوحدة والخرس ثلاث حاجات قلقنى قوى بخاف وحاسة بالوحدة عايزة اقول كلام كتير بس مش عارفة ولا قادرة محتاجة شى يخرجنى من كل دة بدور علية بس مش عارفة اية هو ولا الاقية ازاى تعبت محتاجة تغير محتاجة الاقى نفسى بعيد عن الخوف والوحدة والخرس عايزة الاقى الحل يمكن يكون فى كلام جاهين


فى يوم صحيت شاعر براحة وصفاء


الهم


زال والحزن راح واختفى


انا مت ولا


وصلت للفلسفة


اموت ولا اوصل للفلسفة حل من اتنين فية حل تالت

وأما الجدار

في رحلة حياتنا نصادف جدران عديدة  قد يلفت نظرنا روعة تصميمة ورونقة أو تهدمة وشقوقة  لكننا نمر وننسي الجدار الرائع الذي أدخل  البهجة لنفوسنا...