السبت، 30 يونيو، 2007

مشكلة صديقة




الحقيقة واحدة صحبتى جدا ويمكن اكتر تعتبر توامى ميمرش يوم غير منتكلم اكتر من مرة عندها مشكلة وطالبة رايكم فيها هية طلبت منى دة لانها عايزة تعرف راى اصدقائى المدونين

مشكلتها تتلخص فى الاتى صديقتى دة منتقبة بغض النظر عن مدى موافقتى للنقاب او لا انا متقبلها زى مهى كدة ليها فكرها وانا ليا فكرى فى الموضوع دة بالذات ولا هيى قى يوم قالتلى اتنقبى ولا انا قولتلها انتى لابسة النقاب لية مشكلتها انها كل محد يجيبلها عريس يقول انة صعب علية يدخل البيت من غير ميكلمها الاول ويتعرف عليها برة البيت ولو مرة واحدة لان دخول البيوت مش سهل وانة ميحبش يدخل البيت ووميحصلشى نصيب وتبقى احراج لية وليها لكن هية بترفض حتى فكرة انها تتكلم فى التليفون مع اى حد عريس اقصد ودة بيتسبب ان كتير منهم بيمشوا والموضوع مش بيكمل طبعا العريس دة مش بيكون طالب القاء فى الشارع لكن مثلا فى مكان شغلها او عند قريبة او فى مكان عام وان وبعض منهم طلب ان يكون معها اخوها او اى صديقة ليها والطلب دة فعلا متكرر كتير هية سالتنى وبصراحة انا مش عارفة ارد عليها لانى مش عارفة هل فعلا صح او غلط انها تتكلم مع واحد طيب ولو نفرض ان اخوها رفض الكلام مع اى حد عن طريقها لانة ولى امرها تتكلم من وراة طيب تقول الى بتكلمة متقولشى لاخويا انى كلمتك انا مش عارفة ارد عليها فية اى حل عندكم ليها هية بجد محتارة وانا اكثر حيرة منها

هناك 17 تعليقًا:

Mohamed Hamdy يقول...

هيا فعلا مشكله محيرة .. انا رايى انها مش لازم تستنى الجواز او ان يبقى كلامها كلو بدافع الجواز وخلاص , يعنى ليه متشيلش الموضوع من دماغها مؤقتا , وهى فى الشغل او الدراسه هتلاقى الى بيكلمها عادى مش لازم لغرض الجواز .. ومع الوقت بييجى الحب الى بيترجم لجواز .. وان شاء الله ربنا يسهلها , مع أحتفاظى برأيى فى النقاب لنفسى ( ايموشن بيغمز )

سلامى لقلمك الجميل

momken يقول...

ولا مشكله وى حاجه الى زى دى جوهره محطوطه داخل علبه قطيفه وسياتى من يبحث عن الجواهر والاشيائ الثمينه لكن لو صاحب محل الجواهر اعطى الجوهره يتفرج عليها كل من يريد شرئها وياخدها لفه هتبقى سلعه سهله فى ايدى من لا يقدرها
اسال الله لها الثبات فهى والله على الحق ونحن جميعا على باطل
واذكرها بالايه(ومن يتق الله يجعل له مخرجا ويرزقه من حيث لا يحتسب)
صدق الله العظيم

اختى الغاليه وانا فى منتهى الفخر ان ادعوكى اختى اعلمى ان من يخرج لا يدخل
يعنى الى عاوز يخرج مش بيكون عاوز ينى بيتا
يجب ان يعرف انك افضل من تعمر البيوت بها واغلى ما يمكن اقتناءه
ولكن لابد ان تعرفى انه يحين يتفق ويتقدم لخطبتك فعلا فقد اخد تصريح من رسول الله بان يرى وجهك وكفيك فقط
تمام كانك بالحرم فى بيت الله الحرم
ووقتها ايما ان يقبل شكلك كما تقبل خلقك ويما يذهب لانك انت نفسك لو جاءئك ملثم لن توافقى عليه
هل انتى معى يا اختى
واعتذر لتطويل

تحياتى

ايوية يقول...

عزيزى محمد شكرا لمرورك
موضوع كلامها عن الجواز فانت متعرفشى اية احساس البنت وهية عدت التلاتين من غير متتجوز ونظرات الناس ليها وكلامهم قد اية بيقطع فيها ممكن ناس تاخد الموضوع بهزار ولاكن ناس تانية بتتاثر قوى وخصوصا صديقتى لانها بتتضايق قوى
ممكن هية بتشكرك جدا على رايك

جزر يقول...

انا مش هاقولك قصه اخت واحد صاحبي منتقبه برده وما شاء الله عليها ملتزمه جدا جدا جالها عريس ملتزم وعشان الاتنين ملتزمين كانوا عارفين حدود الشرع ايه
عريسها مشفهاش غير 3 مرات بس حسب الشرع المره االاولي وهوه رايح يتقدم لها كشفت وشها والتانيه وهوه بيقدم الشبكه والثالثه كانوا بيتكلموا عادي وعشان يشوفها المره الرابعه كتب كتابه عليها
قال تعالي({ وإذا سألتموهن متاعا فاسألوهن من وراء حجاب }
توكلي علي الله واثبتي
تحياتي

semsem يقول...

انا اللى اعرفه ان نصيب كل واحده موجود منذ الازل
واللى مش عاوز يدخل البيت ميدخلش

معتقدش ان الناس قاعده تعد كام واحد دخل عندنا وخرج

انا افهم ان التعارف لابد ان يكون فى منزل الاسرة

وربنا يهديها لما فى الصواب
ويرزقها فعلا باللى يعرف يقدرها

تحياتى

ايوية يقول...

والله يا جزر ويا سمسمة ان مشكلتها زى مقولت انها حساسة جدا من ناحية كلام الناس عنها واهلها بالزات وان كتير من اهلها بيجيبولها عرسان بس دة رايهم ومقلكوش على الكالم الى بيقولهولها ان انتى مش هتتجوزى طول منتى كدة وان الى اصغر منك اتجوزوا هية محتارة هية نفسها تثبت على موقفها بس الناس مش بتسكت

غمض عينيك يقول...

ربنا يهديها ويهدينا للي فيه الخير

ايوية يقول...

غمض عينك شكرا للزيارة وربنا يهديها يارب

الربان يقول...

تحياتي

هذا الموضوع مهم...و من رأيي ان يراها في منزلها...و يجلس معها...و ان تخلع النقاب حتي يري وجهها...و يتحدثا
و يتعارفا في نطاق الاسرة....و عسي ان يري في اسرتها من الفه و محبه و ترابط ما يشجعه علي جطوة إيجابية...كخطبة او عقد قران.


لكن رؤيتها خارج المنزل لا تتفق و الحجاب و النقاب...و لن يتمكن من رؤية وجهها...

و للخاطب ان يري من خطيبته الوجه و الكفان....هذا و الله تعالي أعلم.

تحياتي و تقديري و ربنا يسعد الجميع.

Ahmed AL-Hussany يقول...

ياه دي حاجة بسيطة جدا
طبعا متخرجشي مع حد ولا تقابل حد ان شالله في جامع
تقعد في بيتها ويجلها اللي يعرف قميتها
صدقيني دا الصح
انا عملت كده مع نفسي ومع اخواتي البنات
مفيش حد لاخرج ولا راح ولاجه
كله في البيت
وتحت نظر الاسرة
كما يقول الشرع
ثم ايه يعني لو رفضت او اترفضت
ولو ١٠٠ مره
ايه يعني دا مش بيقلل من قميتها ولا حاجة
انا اتقدمت لبنات كتير ورفضت واترفضت اكتر
لا قلل من قيمتي ولا من قيمة البنات
بالعكس كده احسن ما تقع في واحد يتعبها
توكلي على الله وقولي لها
تعقد في بيتها
وان شاء الله يجيلها اللي يقدرها
تحياتي

ايوية يقول...

شكرا ربنان على الزيارة والرد شكرا احمد للرد بس الملاحظ دلاوقتى ان الرجالة بتخاف تدخل البيوت بجد يقولك مثلا خلى القاء الاول يكون مثلا فى منزل قريبة او فى نادى او مكان عام وبحضور احد من الاهل مش عارفة لية بس صديقات كتير ليا حصلتلهم نفس المواقف وكانت مثلا برتوح مع اخوها او والدتها يعنى

huda gamal يقول...

مدونة جميله ماشاء الله..
واسمحيلى اعلق برأى على موضوع صديقتك..
انصحها بعدم التفريط فى اى قناعه عندها فى سبيل الزواج .. يعنى انا بصراحه ماقبلش اكلم واحد ولا اخرج معاه قبل ما يتقدم رسمى بدعوى انه مش عاوز يحرج نفسه بصراحه دى حجه فارغه بالنسبه الى ،انا مابحرموش من حقه الشرعى فى انه يشوفها ويكلمها بس مش لازم يعنى من ورا اهلها .. يعنى الموضوع يبقى فيه مرونه بردو ممكن يكون اللقاء فى نادى او بيت احد الاقارب اللى بيجمعوا بين الطرفين ده لو على اعتبار ان دخوله للبيتها محرج للدرجاتى ..
عموما ربنا يارب يكرمها ويعجلها بالزوج الصالح التقى اللى يجى وهو فخور وسعيد انه هيرتبط بيها ويسعدها ان شاء الله

اعذرينى على الطاله

Hosam يقول...

عزيزتى
ده راى الشخصى ومش هتكلم فى دين بس الاختلاط لما يكون وسط ناس ايه الغلط فيه وبدل فى حدود وقت مش طويل ومش كتير
مش مفروض الرجل بس يهتم يقعد مع المرأه المفروض هى كمان تكون عاوزه تقعد معاه وهى واى انسان عارفه ايه الحدود المسموح بيها
من الاخر تقابل اللى عاوز يتقدملها مش علشان هو عاوز كده لا علشان هى كمان عاوزه كده ومفروض تختار بعنايه وتتااكد انها عوزاه
سلام

ايوية يقول...

هدى انا فعلا قولتلها كدة اية المشكلة ان الزيارة بعلم اهللها محدش بيطلب انها تكون من وراهم هما بيطلبوا انها تكون فى نادى مكان عام وبحضور احد من اهلها شكرا للزيارة

شكرا حسام للزيارة انا كمان موافقة رايك

اسكندراني اوي يقول...

تصمد وتصبر وان شاء الله ربنا حيجزاها اللي تستاهله
اكراما لعفافها وطهرها

تقبلي تحياتي
وارجو ان تنقلي اليها دعواتي بان يرزقها الله من يقدر عفافها

الطائر الحزين يقول...

السلام عليكم

طبعا دخلت متأخر
لكن هاقول رأيى والأجر على الله

ما كان لمؤمن ولا مؤمنة اذا قضى الله ورسولة أمرا ان يكون لهم الخيرة

لازم يتكلموا فى وجود محرم
ودخول البيت من اجل الخطبة
يخطبها ويبدأ التعارف دون تجاوزات

اما اذا كانت خايفة انه ما يعجبهاش او هى ما تعجبهوش والخطوبة تفشل
ويقول عليها الناس ان خطبتها باظت

اقول لها
طول ما انتى بتدورى على رضا الله ربنا عمرة ما هيسيبكم وهيسر لك الامر كله

واذا كان اعتبار كلام الناس افضل من اعتبارك لاوامر الله فخلاص يبقى خليكى مع الناس وكلامهم

واخيرا
اذا صدقت النوايا يسر الله السبل
بارك الله فيكى وفى زميلتك

ايوية يقول...

الطائر الحزين
اشكرك جدا على زيارتك وسوف ابلغها ردك ان شاء الله

اسيرة قلبى

فى كل مرة اقسم  ان تكون الحرب واعد اسلحتى  لاواجهك بها  افضى  ما بقلبى اخبرك عما يؤلمنى منك  عن بكائى ليلا من تجاهلك لى و لوجودى لجرحك لكو...