بلدنا امانة فى ايدينا




مشربتش من نيلها
جربت تغنيلها
جربت فى عز متحزن تمشى فى شوارعها وتشكيلها
ممشتشى فى ضواحيها
طيب مكبرتش فيها
ولا ليك صورة على الرملة كانت على الشط فى موانيها
دور جوالك تلاقها هية الصحبة وهية الاهل
عشرة بلدى نسينها على البال مش سهل
جايز ناسى لانك فيها مش واحشاك ولا غبت عليها
بس اسالوا عنها الى فارقها قال فى الدنيا مفيش بعديها


مع طوفان الاغانى الوطنية الى مش لاقية اى مبرر ليها الا ان هذة الاغنية وحدها شدتنى ولفتت نظرى ان اسمعها مش لانى بحب شرين لكن الن شرين متوظفة فى خدمة الاغنية بنوتة مصرية ذات ملامح مصرية قوى بنت بلد بجد كانت بسيطة فى لبسها مكياجها حتى مشهد الكحك ولمة العيلة فى عميلة كانت مصرية بجد الكلمات مفيهاش الكلام الكبير زى بنحبك يا مصر ولا اى شى ولا اطفال كتير لابسة ابيض معرفشى لازمتهم اية فى الاغنية واية الحكمة من الابيض يمكن انا مش بفهم المهم خلينا فى اغنيتنا لاقيتها خالية من اى تعقيد بسيطة فى كل شى فعلا مين فينا مفيش مكان فى مصر مبيفتكرشى فغية ذكريات جميلة او حزينة مين فينا مزعلشى مرة ونزل اشتكى همة للنيل او البحر فى الموانى او حتى شط الترعة فى الريف مين فينا يقدر يشيل حب البلد دة من جواة فعلا يمكن لاننا فيها مش حسين اننا بنحبها بس لو بعدنا او حصلها حاجة تلاقينا ملهفوين قوى عليها وعلى اخبارها واكلها وكل شى فيها فعلا بلدنا امانة فى ادينا ياريت ميبقاش بالاغانى بس نحاول ندور كدة جوانا هنلاقينا بنحب البلد دة قوى وعايزنها تكبر اكتر واكتر هى ام الدنيا الى لسة شابة تسمحولى اسيبكم واعيد الاغنية تانى

اة صحيح نسيت
بعيدا عن اى شعارات مستهلكة بعيدا عن اى رياء او نفاق
ولانى لست غير ابنة هذة البلد
ولانى مش فى التليفزيون ولا بعمل حديث تليفزيونى وبقول فية انا بحب مصر زى مكون بسمع كلام حافظاة انا فخورة انى ابنة هذة البلد مش عارفة انا كتبت كل الكلام دة لية بس حسيت انى عايزة اقولة الى كل مصرى ومصرية اعتز بكونك ابن هذة البلد وافخر بذلك مهما كانت سلبياتها محدش بيغير امة ولا بيشمئز منها مهما كبرت وكذلك محدش بيغير بلدة بلدنا امانة فى ايدينا

تعليقات

السلام عليكم
بلادى و إن جارت على عزيزة وأهلى وان ضنوا على كرام

بجد والله كلنا بنحبها ونفسنا تكون افضل بلد فى الدنيا
ارك الله فيك
‏قال ايوية
شكرا الطائر الحزين للزيارة
فعلا بلدى وان جارت عليا عزيزة
بس هية مجارتشى علينا ولا حاجة ربنا يخلى بلدنا لينا
‏قال Hany

الأخت الكريمة
لو توقف حبناً لهذا البلد ستموت
لكن الحب ليس كلام أغاني
أو شعارات جوفاء
كلنا نحبها ، ونحلم أن نراها أفضل لكن الأحلام لا تتحقق من تلقاء نفسها ولكنها تتحقق بالعمل علي تحقيقتها

أعجبي هذا الموضوع وطريقة عرضك له
مع وافر تقديري
‏قال Abeer
ده وانتي مطلعة عيني
بحبك مووووووووت
‏قال ايوية
طبعا هانى مش بالكلام ولا الاغانى هنغير شى
بس ممكن كلمة بسيطة تغير انسان وتفكرة تانى بشى نسية شرفت المدونة

عبير

فعلا عندك حق لازم نحب بلدنا مهما حصل لينا فيها شكرا للزيارة
والله يابنتي انا واحد كنت ببقي هعيط أول مابسمع اغنية وطنية وبيجيلي حماس غريب وفعلا ابقي عايز ازاكر عشان مصر
لكن اما بدات احس انها سبوبة واستهتار بتفكيرنا وعقلنا زي دلوقت ولا عاد الشغل ده بياكل معايا
اغاني وطنية ايام الاستفتاءات والانتخابات كان مصر مرضعة تبقي أمنا وقت مانحب وتمشي والجديد بقي مصر بتتغير بينا كوكتيل اعلانات وافلام تسجيليه قبل وبعد وخلال اي نشرة او موجز او مسلسل او متش يحسسك كان مصر هي الجنة
كل الكلام ده خلي الواحد عنده برود ناحية الاغاني دي
لكن احنا لازم يكون حبنا لمصر غير حب الاغاني
بوستك جميل واتمني مكنش خرجت عن موضوعه
تحياتي
‏قال ايوية
شكرا دكتور مستكينس
على الزيارة عندك حق فعلا منا قولت ان فى وسط طوفان الاغانى الوطنية الى ملهاش معنى ولا مناسبة بس يمكن حسيت ان الاعنية دة قريبة منى
شكرا للزيارة
‏قال Abeer
د.مستكنيص

انا لحد الان لما بسمع اغاني عبد الحليم
صورة وعدا النهار
ولا حتى اوبريت عاش عبد الناصر عاش
بالرغم من اني لا ناصرية ولا بحب عبد الناصر
بجد بحس احساس غريب .. غير دلوقتي خالص
لما بسمع مشربتش من نيلها
لا اصل انا بشرب مياة مفلترة
‏قال ايوية
فعلا عبير الاغانى القديمة ليها وقع تانى على الواحد بتاثر فية قوى
‏قال aliaa
لولا احييكى ايه على البوست الجميل ده
وكلنا بنحب مصر فعلا لكن اللى بيحصل فيها هو اللى بيخلينا نزعل عليها ونتعصب وننفعل هو ده السبب لاننا بنحبها بنعمل كده زى ما الاب بيضرب ابنه عشان خايف عليه وبيحبه لكن برضو ده مش صح لكن على الاقل عاوزين نعمل حاجة نصلح بيها بلدنا لكن مش بالعنف
ياريت تبقى تبعتيلى الاغنية دى عالميل
‏قال ايوية
علياء بلدنا حلوة قوى بس لو نحبها بجد وبتفكير وكل واحد فينا يعمل الى علية اكيد هتبقى احلى
شكرا للزيارة
‏قال MaMaDo
اولا
كان سؤال محيرنى
انا كنت مش بحب البلد او يمكن وا ان صغير مفكرتش فيها او سالت نفسى انا بحبها ولا لا
بس ليه انا و انا مش بميل ليها باى حب
ولما اسمع اغنيه وطنيه اعيط او ابقى عايز احطن البلد و اطير بيها

سيبك من كل الى بيقول انه مش بيحبها احنا كلنا بنحبها
مفيش حد بيحب مش بيحب امه
و الاغانى الوطنيه
عشان الى كان بيغنى الاغانى دى بيحب البلد اوى
عشان كده احساسه كل عادل قدر يحرك الحب الساكن الى فى قلوبنا
....
مرورا بكومنت مستكنيص و حتى عبير
فجد انا شايف و ان عمر ما الاغانى دى كان ليها وقتها
لان انا بسمع صوره الوقتى لعبد الحليم و يا حبيبتى يا مصر
لشاديه و ببقى عايز اطيربالبلد برده
يعنى مفيش وقت للاغانى دى و يمكن عمرها ما كان ليها مناسبه


معلش طولت
انا اصلا كنت هكتب ده فى بوست
بس يلا
تحياتى
:))))
‏قال ايوية
شكرا ممامدو للزيارة واحنا فعلا كلنا بنحب بلدنا حتى لو مغنيناش وقولنا بنحبك يا مصر
‏قال wahed
فعلا كلنا بنحب مصر العظيمه ,مهما كان فيه سلبيات بيعملها الشعب
‏قال wahed
بوست جميل احييكي عليه

دايما تمتعينا بموضوعاتك

تحياتي لكي
‏قال ايوية
شكرا وحيد واتمنى تكرار الزيارة
‏قال غمض عينيك
فعلا الاغنية جميلة اوي يا ايه
وانا كان ليا نفس التعليق على اللبس الابيض اللي مكانش له اي لازمة

تحياتي ليكي
محمد سمير
يعجبني في هذا الموضوع كلمة للبابا شنودة و كلمة تانية تخص العبد الفقير
أما البابا فحين يقول مصر وطن يعيش فينا و ليست وطنا نعيش فيه

و اما كلمتي، فهي: الوطن كالأب و الأم، نحب منهما خصالا و نكره خصالاً، لكننا نحبهما اجمالا و نتألم لفراقهما أي ألم
‏قال Desert cat
هو بالرغم من انها مزعلانى لكن برضه بحبها وبفخر بيها جدا

المشاركات الشائعة