الثلاثاء، ٢١ أغسطس ٢٠٠٧

انصحونى

هو الناس اتغيرت ولا انا الى لسة عايشة فى زمن قديم سعات كتير بحس انى زى الى خارجة من فيلم قديم ابيض واسود لما بشوف الناس بتتعامل مع بعضها ازاى دلوقتى بستغرب هو اية الى حصل محدش بيقى مستحمل حد ولا حد بيقبل نصيحة من حد ولا حد اصلا بقى ينصح حد مين الى غلط انا ولا الناس انا مريت بموقف النهارضة احبطنى بنصح زميلة ولاقيتها بمنتهى البرود بترد عليا وتقولى انتى مالك والغريبة موقف الناس انهم بيلمونى انا ويقلولى متسيبها حتى لو راحت فى داهية انتى صحيح مالك متخليكى فى حالك انا الى غلط اعمل اية بس مش عارفة ابطل لو شفت شى فى قدرتى اعملة لحد اوانصحة بيبية انا مش بشكر فى نفسى ولا اقول انى مثالية بس بجد دة طبعى بحب انى لو فى استطاعتى اساعد اى حد يبقى لازم اساعدة من فرج على مؤمن كربة فرج الله عنة كربة من كرب يوم القيامة مش عارفة اتغير ومش عارفة اتعامل الناس
دلوقتى اعمل اية

هناك ٢٣ تعليقًا:

Desert cat يقول...

انا زيك مبحبش سياسة انا مالى وخلينى فى حالى
بس حقنا على بعض النصيحة بس بشرط انها تكون بينا وبين بعض مش على الملأ
انتى صح
وسيبك من الناس
انتى عملتى اللى عليكى واديت حقك تجاه ربنا وتجاهها وهى حرة فى تصرفها بعد كدا

Unknown يقول...

والله يا قطة
كان بينى وبينها بس هية الى علت صوتها انا تعبت من الناس والله انا بنصح لوجة الله وربنا يعلم بس الموقف مائثر فيا قوى

rack-yourminds يقول...

اكيد انتي صح لما تنصحي حد او تساعدي حد ده شئ جميل

بس المشكله فعلا ان النفوس اتغيرت واخلاق الناس اتغيرت كتير ومحدش بيسال في حد

عشان كده اللي بيسأل وبيساعد بيقي نادر الايام دي

تحياتي لكي

بجد موضوعك جميل

aliaa يقول...

ايه انتى على الحق وطالما على الحق اعمليه لو حتى كل الناس هتعمل ايه
ولا يهمك من اللى حصل وعديها وكل خير انتى بتعمليه خير ليكى وكله عند ربنا
وربنا عالم بكل اللى بيحصل

ولا تزعلى وانتى مش محتاجة نصيحة حد انتى صح واستمرى

اسكندراني اوي يقول...

استمري
انتي الصح
الدين النصيحه

ولكن احذري ان تكون النصيحه من فوق
ما تبينيش للي بتنصحيه انك انتي احسن منه او اعرف منه او افهم منه

ما تزعليش من موقف صاحبتك
مش معنى عدم تقبلها انك انتي الغلط


استمريييييي

Unknown يقول...

شكرا واحد
شكرا علياء
شكرا اسكندرانى
والله بجد انا احترت لية بس الناس اتغيرت كدة

friend يقول...

انا مع الاراء اللي قالت استمري علي النصيحه واللي ميعجبهوش يخبط دماغه في الحيط

Unknown يقول...

شكرا جزر
نورت المدونة بس بجد الواحد بيتعب قوى ومش عارف يتعامل مع الناس دلوقتى

aleron يقول...

فى أوقات الواحد مبيبقاش قابل النصيحة من حد

لما بيكون بيعاند نفسه و عارف ان اللى بيعمله فعلا غلط

أو لما يكون عنده هدف من ورا العمل ده بس مش ظاهر لسه

فأنتى عليكى النصيحة و بس

سواء استفادت بيها أو لأ

مش كده يا دكتورة :)

الطائر الحزين يقول...

ليست المشكلة فى النصح

المشكلة فى الطريقة
والاسلوب والوقت المناسب

لابداء النصيحة

والناس كلها اصبحت مضغوطة

اللهم عافنا جميعا

Unknown يقول...

aleron

عندك حق
بس حتى انك تنصح دلقوتى بيتقالك وانت مالك متسيب الى يغرق يغرق

الطائر الحزين

ممكن تكون الناس مضغوطة بس ممكن اخد النصح ومعملشى بية مش ارد عليك واقولك وانت مالم متنصحنيش

غمض عينيك يقول...

ولا تعملي حاجة
خليكي زي مانتي وماتتغيريش
طول ما في ايدك حاجة اعمليها واحتسبيها عند الله
وبردو لازم تعذري الناس...كل واحد بقا جواه هموم ومشاكل ومبقاش في امان زي زمان
ياترى انهى كان احسن ايام الابيض واسود ولا الالوان

تحياتي ليكي يا ايوية
وشكرا على سؤوالك عليا
محمد سمير

غمض عينيك يقول...

بالمنابة مبروك ع اللوك الجديد
جميل اوي
كل سنة واتني طيبة

Unknown يقول...

محمد سمير
اهلا بيك مرة تانية بقالك كتير مش بتعدى
والله انا عازرة الناس بس سعات بتضايق وبتبقى مش عارف تنصح الناس ولا تسيبهم انا مش بقول انى صح على طول بس بحاول
وشكرا يارب يكون الشكل عجبك
وكل سنة وكل الناس طيبة

Ahmed يقول...

ازيك يا ايويه
انتي صح
واوعي تتغيري
وسيبك من اللي حواليكي
بكره يعرفوا قيمتك
لما الدنيا تضيق بيهم
ومايلقوش حد جنبهم غيرك
انتي صح وهما غلط
تحياتي

Unknown يقول...

شكرا احمد
انت فين من فترة مش باين
المشكلة احمد انك احينا بتحس اية فايدة الى بتعملة مدام محدش مهتم بية

احساس لسه حى يقول...

عزيزتى
فى الزمن ده لازم تختارى مين اللى تديله النصيحه وطبيعته ايه
تانى شئ الوقت والمكان المناسب للنصيحة دى
تالت شئ ازاى اقوله النصيحه
انتى لما نصحتى زميلتك توافرت الحاجات دى
ما اظنش
تحياتى ليكى ولحب الخير لغيرك
سلام

Unknown يقول...

احساس لسة حى

اكيد كلامك صح
بس صدقنى انا لا اتعمد نصح الغير بشسكل يحرجة

مهبول ومهبوله يقول...

بصراحه وبكل وضوح كده
من منك كنت شربتها قلمين قولتلها فوقي انا صحبتك بس برضه انتي الكبيره وانا بهديء النفوس يعني

استمري علي النصيحه فهذا افضل

مهبول

Unknown يقول...

شكرا مهبول الطيب احسن

Dr. Eyad Harfoush يقول...

لا تغيري نفسك أبدا يا آية المدونين
فالى ان يرث الله الارض و من عليها سيبقى الخير صفة رائعة و يبقى حب الناس اكثر ما في الانسان انسانية، تحياتي و احترامي

Unknown يقول...

د / اياد

اسفة لو اتاخرت فى الرد
دايما بتسعدنى تعليقاتك
اشكرك

Unknown يقول...

ان النصيحة اعزاز و لكنها تجب لمن تتوسمى فيه حسن التقدير, أما من هو غير ذلك ينطبق عليه قول توفيق الحكيم , ماذا علينا لو لم تفهم البقر

هيثم حرفوش

وأما الجدار

في رحلة حياتنا نصادف جدران عديدة  قد يلفت نظرنا روعة تصميمة ورونقة أو تهدمة وشقوقة  لكننا نمر وننسي الجدار الرائع الذي أدخل  البهجة لنفوسنا...