الثلاثاء، ١١ سبتمبر ٢٠٠٧

احلى ما فى رمضان










رمضان كريم وكل سنة وكل الدنيا بالف خير يارب




عارفين احلى ما فى رمضان اية طبعا بعد انة شهر الروحانيات والصوم والتقرب الى الله





احلى ما فية حجات كتير مبنعملهاش غير فية لمة العيلة لان كل العيلة بتتلم فى وقت واحد للفطار والسحور مش فى الايام العادية الى فقدنا فيها اللمة دة كل واحد وقت مبيجى البيت بياكل لوحدة





غير كدة الزيارات وعزومات الفطار امر برضة بنفتقدة فى الايام العادية وكل فين وفين لما بنفكر نزور حد من قرايبنا





فانوس رمضان الى بجد لحد دلوقتى بفرح جدا لما بيجيلى فانوس جديد وبالرغم من وفاة والدى الا ان امى ربنا يخليها ليا بتصر انها تجيبلى فانوس انا واولاد اختى كل سنة





واحلى حاجة بقى كنت بحبها بس للاسف اختفت من كتير من شورعنا زينة رمضان الى كنا بنعملها بايدنا وبورق ملون وكنا نعلقها فى البلكونات مع الفانوس مش عارفة لية اختفت العادة دة لية مش ام تحاول انها تجيب ورق ملون وصمغ وخيط وتعلم ورالدها يعملوا زينة رمضان بنفسهم ويعلقوها فى البلكونات اكيد هيفرحوا جدا وهيحسوا برمضان اكتر وتبقى كل شوارعنا فيها فرحة رمضان





ياريت بجد نحافظ على عادتنا الجميلة دة ومش نغيرها ولا ننساها وياريت كمان فانوسنا يرجع زى الاول الفانوس الجميل مش البلاستك الصينى الى بيغنى الى مش بحس فية بفرحة رمضان ابدا





يارب اعد رمضان علينا بالخير والبركة





سبحة رمضان لولى ومرجان بثلاثة وثلاثين حباية



ثلاثة وثالاثين



منهم ثلاثين ايام رمضان نور وهداية



وثلاثة العيد ونقول ونعيد



ذكر الرحمن اية باية



سبحة رمضان رحمة وغفران ورضاء الرحمن وحدة كفاية



كل سنة وانتم بالف خير





هناك ٢٥ تعليقًا:

rack-yourminds يقول...

أولا كل سنه وانتي طيبه

ورمضان كريم


فعلا اجمل شئ في رمضان بعد الروحانيات وقراءه القران والصلاه,هي اللمه وزيارة الاهل والاصدقاء

رمضان بجد كل حاجه فيه بتبقي حلوه

بس انا كمان بفرح برمضان لانه مرتبط عندي بالعجوه مع اللبن بحبها كتير ههه

احنا في شارعنا ركبنا بقي زينه وفانووووس كبير يعني الواحد بيفرح بالحاجات دي

تحياتي لكي ورمضان كريم

سابرينا يقول...

الله أكرم!!1
يارب يبقي لنا نصيب من خيرة وبركاته

الطائر الحزين يقول...

اللهم بغلنا رمضان وانت راضى عنا
واكرمنا واحسن الينا برحمتك ووفقنا لما تحب وترضى

بارك الله فيك

Unknown يقول...

واحد

محابظ وبانتظام انك تكون اول رد عندى ربنا يخليك
انا كمان حب العجوة باللبن جدا بس للاسف محرومة منها رمضان دة علشان بعمل رجيم قاسى ومستغلة رمضان بس برضة يعنى هاخدلى معلقة كدة بس مش تقول للدكتور
رمضان كريم وكل سنة وانت طيب

سابرينا

يارب كل الناس تسعد برمضان ويبقى شهر الخير علينا يارب

الطائر الحزين

كل سنة وانت بالف خير

غمض عينيك يقول...

انا بحب اوي اغنية سبحة رمضان
كل سنة وانتي طيبة يا ايوية ( قصدي يابيلا)ورمضان كريم عليكي ان شاء الله

عارفة انا لسه كنت بتكلم في الموضوع ده امبارح...فعلا انا ملاحظ ان موضوع الزينة بتاعت رمضان مبقتش كتير زي زمان
انا كنت فاكر اني انا اللي مش باخد بالي بس طلع الاحساس صح


بس انا بحب اوي لمه العيلة وساعة قبل الفطار

تحياتي ليكي
ورمضان كريم
محمد سمير

Unknown يقول...

محمد سمير

فعلا انا مفتقدة الروح الجميلة بتاعة زينة الشارع والفانوس المتعلق فى كل بلكونة
كل سنة وانت بالف خير

محمد حمدي يقول...

كل سنه وانتى طيبه
وكلامك فعلا صح .. ولو تلاحظى رمضان بدات ريحته تهل اهو

كل سنه وانتى طيبه تانى

Unknown يقول...

وانت بالف خير يا محمد
ويارب يجعل رمضان سعيد علينا كلنا

اسكندراني اوي يقول...

حاجات كتيييير من اللي كنا بنعملها واحنا صغيرين ماعدتش موجوده دلوقتي

بس برضه ريحه رمضان مازالت موجوده
اي نعم مش زي الاول بس اهو الجوده بالموجوده

كل سنه وانتو طيبين

Unknown يقول...

وانت طيب يا اسكندرانى
وربنا يحققلك كل امنياتك يارب

أبوسويلم يقول...

فعلا اللى بيميز غير العبادات والطاعة
روح رمضان والجو العجيب اللى ما بيتوجدش الا فى الشهر الفضيل
لكن للاسف زى ما قلت كتير من الحاجات اللى اتعودنا نشوفها فى رمضان واحنا صغيرين اما لم تعد موجودة
او اتغيرت بشكل كبير
يللا كبرنا بقى
كل سنة وانت طيبة
رمضان كريم
والسلام

Unknown يقول...

كل سنة وانت طيب
يا ابو سويلم
ويارب يبقى شهر الخير علينا كلنا

Desert cat يقول...

رمضان ئهر الروحانيات
انا قبل رمضان بيوم كان فى ولاد فى الشارع بيعلقوا الزينة
وكنت مبسوطة بيهم اوى لدرجة ان كنت عايزه اصورهم والله بس خفت احسن يفهمونى غلط ولا حاجه
رمضان كريم
وكل سنة وانتى بالف خير وصحة وسعادة

dr.Roufy يقول...

رمضان كريم يا قمر

وكل سنة وانتي بكل خير وسعادة يارب

Unknown يقول...

كل سنه وانتى بالف خير يا قطة
فعلا انا بحس برمضان من الزينة والفوانيس طبعا دة غير حالة الجو الروحانى الى بتبقى موجودة

د / روفى
كل سنة اونت بالف خير

3abdo me7tas يقول...

مع اول مرة ليا هنا اقدر اقول
كل سنه وانتى طيبة يا رب ويعود عليكي الأيام بخير آمين

هو فعلا زمان كان رمضان بنحس بيه عن طريق الزينة والفوانيس
كانت الزينة دى لما الواحد بيشوفها قلبه بيدق بسرعه اوى مش عارف ليه
بس فعلا دلوقتى قليل اوى ان الواحد بيشوف زينه فى الشوارع مش عارف ليه
كل سنه وانتى طيبه
ورمضان كريم
جزاكى الله كل خير بإذن الله

http://kasperb4.blogspot.com/ يقول...

على فكرة لسة لحد النهاردة الاولاد عندنا بيعملو زينة وبيتجمعو تقريبا يومين متتاليين لحد ما يخلصو المربع بتاعنا كلو

اصل كل مربع ف شارعنا له مجموعة أطفال مخصوص من المربع هم للي بيعملو الزينة

وممكن كمان يساعدو بعض بالافكار بتاعتهم يعني ممكن يكون في تعاون بين اكتر من مربع سكني

:D :D :D

والله بيبقى نفسي انزل معاهم واعلق الزينة والعب واضحك واهزر ونجري ورا بعض زي ما كنا بنعمل زماااااااان
بس هو ده حال الدنيا بقى جيل بيسلم جيل
ايييييييييييييييييييه دوونياااااااااا

ههههههههههههههههه
-----

اسف ع الاطالة بجد بس فكرتيني بالذي مضى
:)

aliaa يقول...

اله عليكى يا ايه
حته موضوع تحفــــــــــة
بجد والله جميل
ربنا يبارك فيكى
فعلا اجمل حاجة فى رمضان اللمة والفانوس وذكر الله والصلاة جماعة وامتلاء المساجد بالمصلين

بس انا بقى الحمدلله كل الناس اللى فى الشارع بيحطوا زينة رمضان عندنااااااا
وبتبقى جميلة اوى

تحياتى ليكى يا عسل

Unknown يقول...

3abdo me7tas
شكرا للزيارة وياريت متكونشى الاخيرة
وكل سنة وانت طيب وميرسى جدا للزيارة
وعندك حق ياريت الحجات دة ترجع تانى

آلام وآمال

والله انا كمان نفسى ارجع العب بالفانوس تانى فى شارعنا
الزمن بقى
مش عايزة اسف لالاطالة يارت تطولوا بجد انا بحب تعلقاتكم

شكرا علياء

خلاص هاجى اسكن عندكم
كل سنة وانتى بخير

hana يقول...

كل سنة وانتى طيبة

ورمضان كريــــــــــم

Unknown يقول...

وانتى بالف خير يا هنا

قطوف يقول...

رمضان كريم

Unknown يقول...

الله اكرم يا سى السيد

Dr. Eyad Harfoush يقول...

كل عام و انت بألف خير ايها الاخت الذهبية القلب

Unknown يقول...

وانت بالف خير يا دكتور اياد

وأما الجدار

في رحلة حياتنا نصادف جدران عديدة  قد يلفت نظرنا روعة تصميمة ورونقة أو تهدمة وشقوقة  لكننا نمر وننسي الجدار الرائع الذي أدخل  البهجة لنفوسنا...