الخميس، ٦ سبتمبر ٢٠٠٧

انقذوا عقلى

من كام يوم كنت فى زيارة لصديقتى وطبعا فوجئنا باخوها وضيف جاى معاة طبعا صديقتى وانا دخلنا لانها منتقبة ومينفعشى تقعد مع الضيف وبعد شوية دخل اخوها وقالها تحضر نفسها وتيجى تسلم على الضيف وانة صديقة طبعا مش هتسيبنى لوحدى ورفضت انى امشى وخرجت قعدت معها وكان ما كان
بعد طبعا السلامات والتحيات وطبعا الى لا اخوها ولا الضيف كانوا طايقنى فى القعدة ودة حسيتة من اول لحظة وكل مستاذن تقولى لا اقعدى طبعا انا عندى دم وحاسة انى مش مطاقة فى القعدة بس هية ماسة فيا بشكل هستيرى غريب وبدا الكلام واخونا دة عمال يعرف نفسة ويتكلم عن نفسة واطبعا منسيش يقول فى وسط الكلام على انة بيدور على بنت الحلال الى تعينة فى تحمل الحياة وشئون الدعوة وطبعا كل دة انا ساكتة يعنى محبش احشر نفسى فى كلام مليش فية انا قاعدة مجاملة الا وقال كلمة خرجتنى عن صمتى وهية انة طبعا ملتزم وبيحب تطبيق شرع الله وان شاء الله طالب التعدد وان زوجتة موافقة على دة
انسحبت انا من لسانى وقولتة هو مفيش فى شرع ربنا حاجة ناقصة حضرتك مطبقتهاش غير التعدد
طبعا رد عليا بعد شوية وقال
اولا انا لا اطلب حاجة غير شرعية
ثانيا التعدد من الشريعة الاسلامية
والتى ترفض التعدد ولا تقبلة فى لا تقبل جزء من شرع
الله
الموضوع بقى سخن فى دماغى

هو لما ارفض انى اكون زوجة تانية او ارفض زوجى يتزوج عليا ابقى خرجت عن شرع الله ورفضتة

قالى ايوة

قولتلة ازاى اذا كان النبى صلى الله علية وسلم رفض ان احدى بناتة تكون ليها ضرة

قالى بس النبى تزوج اكتر من مرة
قولتلة دة كان بامر من السماء وكل زيجة لها ظروفها


بداء يتعصب ويقولى الاية القرانية واضحة وسيدنا الحسن كان مزواج

انا قولت وربنا قال ولن تعدلوا بين النساء ولو حرصتم


وقال نص صريح ولن تعدلوا

بصيت لاقيتة بيقولى كلمة غريبة

المشكلة يا اختى الكريمة ان الملتزمين اصبحو يفكرو بتفكير المجتمع والعوام



قولتلة هو المجتمع والعوام مش مسلمين يعنى ولا اية

نعم طبعا فى فرق فى التفكير والالتزام والادب والحركة والانفعال وصلة الرحم واداء الحقوق والالتزام بالواجبات واخذ النفس بالجد وترك الهزل والتزام الحق والبعد عن الظلم

كل دى فروق بين الملتزم والانسان العادى الذى لا يعنية غير نفسة وهواها

يعنى حضرتك بس الى تقدر تفرق بين الملتزم والعادى
قالى طبعا
الملتزم هو الى يجبر نفسة على فعل الشى حتى ولو خالف هواها

يا سيدى الفاضل حضرتك عملت كل شى واديت كل حقوق الله والتزمت بكل الاوامر والنواهى وكل الى فاضل بس التعدد

لاقيتة بصلى بنظرة غريبة ولاول مرة يبصلى من ساعة بداية الكلام

وقال لاخو صاحبتى نكمل بقى الى كنا جاينلة مرة تانية

ومشى
الى فهمتة بعد كدة ان الاستاذ كان عريس وجاى لصحبتى وانا بغبائى طفشتة منها مهو طبعا مش هيقبل يتجوزها وليها صديقة من الناس العادية مش الملتزمة
علما بان ما بينى وبين ربى بينى وبينة فقط ولا يهم اى احد من البشر ان يعلمة
المشكلة بقى ان صاحبتى مكلمتنيش من وقتها تفتكروا حصلها اية ولا قاطعتنى
يارتنى متكلمت هو لسانى دة الى مودينى فى داهية

هناك ٣٢ تعليقًا:

rack-yourminds يقول...

حضرتك اثرتي موضوه مهم جدا

للاسف الشديد التدين اللي عندنا هو تدين شكلي وكاذب

تلاحظي الجوامع مكتظه بالمصلين لكن هلي الصلاه انعكيت علي سلوكهم للاسف لا

الكل بيهتم بالمظهر وكأن المظهر هو المطلوب

تلاقي كتير بيتلو ايات الله سبحانه وتعالي لكن هذه الايات العظيمه لم تمس
قلبه


كتير من الشباب بيحرص علي المظهر فقط لكن للاسف قلوبهم فيها خراب


اما مسالة التعدد فدين الله لم يجعل هذا سداح مداح يمعني ان ديننا العظيم وضع للتعدد شروط لكن الاصل يا سيدتي واحده فقط

بمعني التعدد بيكون في ظروف وحالات معينه لكن الاصل واحده فقط


سيدتي لا تلومي نفسك انتي قلتي ما يدعوا اليه الشرع وكمان انتي لم تقصدي الاساءه لها او انك تضريها

انتي فقط انفعلتي لانك اردتي ان تفهمي هذا الشخص شئ هو فاهمه غلط

واردتي ان تقولي راي الدين الصحيح لهذا الشخص

فلا تلومي نفسك


تحياتي لكي علي هذا الموضوع الهام

تسلم ايدك

الطائر الحزين يقول...

السلام عليكم

أثرت مواضيع عدة لها جوانب مختلفة وكل قضية لها رد لوحدها مش عارف أكتب تعليقى على الاسلوب بتاع الزواج
أم على ان التعدد
أم على ان الرسول لم يقبل أن تكون لابنته ضرة

قل حاجة من الحاجات دى ناقص لها تكملة

يعنى اسلوب الزواج الاول ايجاب وقبول
يعنى لو صديقتك وافقت به يبقى انتهى الموضوع
أما ان يزكى نفسة كما فهمت بهذه الطريقة هذا صعب جدا واعتقد أن الملتزمين والدعاة الذين اعرفهم قمة فى التواضع وانكار الذات والاحساس بالذنب

اما قول الرسول صلى الله علية وسلم لم يقبل أن تكون لابنتة ضرة هذا صحيح لكن للأمر تكملة وهو انها كانت بنت عدو الله أبو جهل

القضايا متشابكة

التعدد من الشرع هذا لا خلاف فيه وان الله سبحانة وتعالى لا يشرع شىء به ضرر للناس

فعلا ان كان رد عليك بهذا التعالى والكبر فهذا امر لا يجوز حقا

اعانك الله وجزاك خيرا
حاولت اختصر فى ردى على قدر استطاعتى وعذرا على الاطالة

aliaa يقول...

اولا يا ايويه زميلتك هى اللى اصرت انك تقعدى معاها ومتمشيش وممكن تكون هى كانت فاهمه ان ده عريس جاى لها ومكنتش عاوزاه اصلا فكانت عاوزاكى تقعدى معاها عشان ميعرفش يتكلم وعدم اتصالها بيكى ممكن يكون ان خوها منعها من الاتصال بيكى بسبب اللى حصل وبالنسبة للكلام اللى اتقال ده فاللى استغربته طريقة كلامه انه ملتزم وبيطبق شرع الله مين اللى قال كده حد قاله ولا هو شايف كده لعلمك اللى يشوف انه بيعمل اللى يرضى الله بهذه الطريقة يبقى اكيد غلطان لان الواحد كلما شعر انه مقصر مع الله وفى حقه كلما زاد فى التقرب منه لكن ده بيقول انه متدين وملتزم ومش عارف ايه ايه ده ؟ هو مين نبى ولا ايه ؟
والتعدد مش حرام بس للى يقدر يعدل فعلا هو قادر انه يعدل ؟ بس انا عن نفسى لااقبل الا فى حالة ان فيه ظروف وطبعا يكون باتفاق بينا
بس اذا كان ليها خير فيه كيد هيكون ليها وربنا الاعلم وربنا هو مسبب الاسباب
متضايقيش نفسك والله يفعل مايريد

Unknown يقول...

عزيزى واحد
اكتر شى بيضايقنى انى اشوف اننا الى بنسئ لدينا الجميل بنفسنا بامثال هؤلاء

علياء
حمد الله على السلامة
عندك حق فقد كان الرسول يكثر من الدعء بالمغفرة ولما سل عن ذلك وهو المغفور لة
قال اولا اكون عبدا شكورا


عزيزى الطائر الحزين

انا مش فاهمة حضرتك بتنتقدنى ولا اية
عموما
وهل تعتقد انها لو رضيت هيكون بافتناع هو مجرد انها تقول انها موافقة يعنى موافقة فية ظروف كتير سيدى الفاضل بتفرض علينا قبول ما لا نيجب
وهل تعتقد ان الزوجة الاولى موافقة على اقتناع بالزواج
ولا برضة مهدد بالطلاق وانبذ المجتمع للمطلقة
دة بمجرد انى اختلفت معاة فى نفطة ليست من جوهر الدين كفرنى
انا مقولتش ان شرع ربنا بة ضرر
انما ربنا شرع التعدد لظروف محددة
انما ال بيحصل دلوقتى اقل ما يقال عنة فراغة عين رجالة باسم الشرع واسفة للفظ دة
يا حبيبى يا رسول الله
فكم من الفظائع ترتكب بدعوا انها من سسننك
اما عن حديث الزواج فالى انا اعرفة ان الموقف كان ان سيدنا عل كان عايز يناسب قبيلة ليشجعها على دخول الاسلام مش بنت ابو جهل

محمد حمدي يقول...

شوفى باختصار .. انتى طبعا كلامك صح , بس ميتقالش فى موقف جواز .. يعنى متهيالى طالما هو جاى يتقدم يبقا متهيالى صاحبتك موافقه على موضوع التعدد دة ...

لكن موقفك أنتى صح ميه فى الميه .. وانا شايف انك تكلمى صاحبتك وتشرحيلها الظروف وتفهميها انك مكنتيش تعرفى الملابسات وتقوليلها ان دة مجرد راى منك

اما عن التعدد فا انا شايفه انه اكبر ظلم للمراه وشايف انه حرام كمان .. بس مين يفهم

تحياتى لقلمك الحساس

Unknown يقول...

الحقيقة محمد
من الى وضح ليا قبل اخوها ميجى انها مكنتشى على علم باى شى لانها هية الى حدتت موعد الزيارة دة ليها يعنى لو عندها علم بالعريس مكنتشى قالتلى اجى اليوم دة
وعن موضوع التعدد مين بس يقنع الناس دة ان شرع ربنا مش ممكن يظلم اى انسان من عبادة وان لة حكمة بس مين يفهم
شكرا محمد للزيارة والتعليق

غمض عينيك يقول...

والله ياايوية احسن حاجة انك رديتي ومسكتيش
تعدد الزوجات بيكون لسبب ومش كده وخلاص وان كان هو ناوي يتجوز صاحبتك يبقى لازم يوضح السبب ولازم هي توافق وطالما انتي بتقولي ان اسلوب رده عليكي كان بالشكل ده يبقى فعلا هو مايستحقش ياخد الدور اللي هو معيش نفسه فيه والا كان قعد وكمل نقاش بكل ثقة وهدوء

كده ميه ميه يا بيلا

:)

لي ملاحظة صعيرة...ردك على الطائر الحزين كان قاسي حبتين في الوق اللي الراجل فيه كان بيوضح وجهة نظره بكل لطف بس يمكن حصل سوء تفاهم في فهم الكلام المكتوب

ياعم طائر ياحزين ابقى حط وش بيبتسم او بيضحك عشان تون الكلام يبان انه بالهادي

تحياتي لكم
وكل سنة وانتوا بالف خير
رمضان كريم
محمد سمير

klmat يقول...

صديقتك منقبه ويدعوها اخوها
للجلوس مع صديقه هذا تلميح لقعده
تعارف للجواز
من وجهه نظرى كنتى تصرى على الانصراف
لكن اصرار صديقتك ممكن يكون ناتج
عن خجل لانها حددت الميعاد
المهم حصل خير
طبعا رأيك صح فى مسأله التعدد
لكن فى ناس بتحاول تبرر رغبتها بالدين
ونظرا لصعوبه الجواز فى اسر بتوافق
الله واعلم براى اسره صديقتك
بس واضح ان اخوها عنده الرغبه
اتصلى بصديقتك واسالى عنها
والكلام حايجيب بعضه
ده حايريجك من الحيره
وياريت تعرفنا الاخبار
مهم اوى نعرف اللى جولنا بيقكروا ازاى . مع تمنياتى بكل الخير
لك ولصديقتك
تحياتى وسلامى

الطائر الحزين يقول...

الاستاذة الفاضلة

انا لا انتقد تصرف حضرتك
انا بناقش الموضوع من جوانبة على حسب فهمى له

قلت أن اسلوب الرجل فى الحديث فيه كبر لا يجوز

اما عن أن رسول الله لم يوافق على زواج سيدنا على على ابنته فاطمة فهو لهذا السبب كما ذكرت

http://arabic.islamicweb.com/Books/seerah.asp?book=5&id=2099

ادخلى هذا الموقع للتأكد

انا لا انتقض تصرف حضرتك فى هذه الجلسة
وكان من المتوقع أن تتحدث صديقتك وتدلى برأيها ولا تسكت هذا السكون

بارك الله فيك

Unknown يقول...

احب اعتذر للطائر الحزين انا مقصدتش انى اكون عنيفة معاة
اعتذر للمرة التانية

محمد سمير
شكرا للزيارة والرد وللاسف فعلاكتير من الناس مش قادرة تفهم السبب الى ربنا شرع بية التعدد

كلمات

والله بعد جهد قدرت انى اتصل بيها على الموبايل وردت عليا واتضح انها متخانقة فعلا مع اخوها بسبب انها رافضة العريس وبيحاول يضغط عليها
وطبعا هو ولى امرها لانها يتيمة
وكانت حالتها النفسية سيئة جدا
طبعا واضح من كلمها انة حرج عليها الكلام معيا بس ادينا بنتكلم على الموبايل

عزيزى الطائر الحزين

قرات الموقع الى حضرتك بعتة وحتى لو كان ذلك صحيح مع اختلافة عما سمعت انا ايضا
فالنبى قال ان ما معناة فاطمة بعض منة وما يسيئها يسيئة
وان كان على ان صديقتى متكلمتشى فحط نفسك موقف فتاة يتيمة لاخ متشدد
واعتذر للمرة التالت ة لو كلامى كان قاسى

Desert cat يقول...

ليه كدا بس يا ايوية
طفشتى العريس بتاع البونية
الراجل داخل على نور
وبيتكلم ان صديقتك لازم توافق على التعدد مش يمكن كنتى انتى ىالتانية او التالته وهو اسمه مش فرق الاصدقاء عن بعض بس خلاهم ضراير جمع ضره
والله كويس يا حبيبتى انك مسكتى اعصابك
ده لو انا كان زمانى خليت اللى ما يشترى يتفرج عليه

Unknown يقول...

مش كدة برضة يا قطة
والله انا مسكت اعصابى على الاخر
وكنت قاعدة بجز على سنانى
شكرا قظة للزيارة

Abeer يقول...

لا طبعا انا لو كنت مكانك كنت قلت اكتر من كدا

الناس ديه دماغها ماتت من زمان واتحولت لحجر
ومش فاهمين الدين صح .. بياخدو منهم اللي عايزينه وخلاص
وزي ما انتي شفتي اول ما ابتديتي تشرحي وجهة نظرك انسحب لانه مش فاهم ومش قادر يجاريكي

وفاهمين ان الالتزام ما هو الا مظهر بس لحية .. تقصير .. اتجوز اربعة .. ولما اجي اكلم واحدة ابص في الارض

بيكرهوا الناس في الدين واسلوبهم في الدعوة غلط مليون في المية

وبعدين زواج الرسول من اربعة في نفس الوقت ده كان له ظروف معينة
وربنا اباح التعدد بشرط العدل .. وقال ان ده صعب انه يتحقق

ناس غريبة فعلا
ربنا يهديهم

Unknown يقول...

عبير شكرا للزيارة وعند حق فعلا
فية ناس واخدة الدين مجرد لحية وجلباب وتعدد

أبوسويلم يقول...

اولا ابدى اعجابى بمدوناتك الجميلة جدا جدا والرقيقة ايضا بس اى واحدة هى الاساس للعلم فقط
ثانيا اكيد صاحبتك عندها علم بالشاب ده وهو جاى ليه واكيد عارفة وجهة نظرك فى التعدد وبالتالى انت لا تتحملى وزر فى هذا الامر وارى انك ما غلطيش
لكن انا ممكن اختلف معاك فى التعدد
التعدد زى ما قلت شرعه الله واكيد لصالح المجتمع فلا يجوز ان اناقش هذا الامر او اربطه بتطبيقى لباقى الدين لان بالشكل مش هنطبق اى جزء من الدين
انا من واحد لا اعتقد انى قد اتزوج اكثر من واحدة لاسباب شخصية وليست فقهية ولان طبيعتى انى محب للاستقرار والبساطة
لكن هذا لايمنع ان الواحد قد يضطر للتعدد لاى سبب
ولا يمنع ايضا ان المجتمع فى ظل الفساد والعنوسة والمغالاة فى المهور وخلافه لن تحل هذه المشاكل الا بتقبل التعدد طالما ان الطرفين متفاهمان على ذلك وليس هناك ما يمنع شرعا او مقدرة
دى وجهة نظرى وياريت تتقبليها يا اختى الكريمة وتفكرى فى كلامى بهدوء
وربنا يوفقك
وكل سنة وانت طيبة
والسلام

Unknown يقول...

عزيزى ابو سويلم

نورت المدونة وشكرا لزيارتك الى اتمنى متكونشى الاخيرة المدونة الاصل هية دة مذكرات شابة الى بكتب فيها كل الى نفسى اكتبة واخد راى اصدقائى فية
اما عن موضوع صديقتى فهى اقسمت انها مكانتشى تعرف اى شى عن ان فية حد جى يزورهم
المهم
انا مقدرشى اقول اى شى عن شرع ربنا ولا انكر ان التعدد شرع ربنا وانة لية اهدافة الى ربنا برضة وضعها وشروطها الى لازم نلتزم بيها مش مجرد ان ربنا وضع فى شريعتة التعدد يبقة نفذة بدون تفكير فى حكمة ربنا منة الى قننتة مش فرض واجب زى الصلاة والصوم
دة قال بالنص انا الحمد لله ملتزم
بحب تطبيق شرع الله وانة طالب التعدد
طيب دة كلام يرضى ربنا لو زوجتك كويسة ولية تتجوز عليها
تفتكر انها راضية وموافقة بحسن نية ولا لان مفيش قدامها غير الرضا الن الحل التانى تشريد اسرة
هل ربنا يرضى بكدة وهل سيكتفى بدة
والى عرفتة بقى مؤخرا
ان الزوجة الجديدة الى كان ناوى انها صديقتى هية التالتة
يعنى فية زوجتين على ذمتة فعلا
هل دة شرع الله

Abeer يقول...

يا نهار ابيض اتنين والتالتة
معلش ده مش شرع الله باة
ديه فراغة عين

ابو احمد يقول...

صباح الفل
انا كل مادخل على مدونه من مدوناتك اكتشف جوانب جميله من شخصيتك انت يابنتى صح سيبك من كلام الطائر الحزين واللى زيه دول نظرتهم للمراه نظره شديده الاحتقار وان زوقوا الكلام بصوره تحاول ان تكون متحضره لكنهم ينظرون اليها كمتاع وسبب لكل مشاكل الكون لاتفقدى ايمنك بنفسك ولارومانسيتك دى اشياء جميله بتخلى طعم الحياه حلوه وتخليكى طائر محلق مش حزين

Unknown يقول...

والله يا عبير دة الى حصل بجد انا نفسى اتصدمت لما قالتى كدة رربننا يهدى

ابو احمد
سعيدة لزيارتك جدا وشكرا لكلامك الرقيق المشكلة انهم عايزين يرجعونا ميت سنة لورا مش عارفة مصلحة مين دة

حسن مشالي يقول...

كل عام وانت بخير
لا فض فوك فيما قلتيه
وبالنسبه للشيخ عريس فمن كلامك
ومن كلامة حسيت انه واخد الشرع سكة
لغرائزه وشهواته
وللاسف ناس كتير كدا بتاخد الالتزام
وسيلة للمكتسبات بينما يفترض ان يكون
وسيلة للتقرب الى الله ورفعة شأن الدين
والفوز بضوان الله سبحانه وتعالى
______________
اما صديقتك اما انها منعت عنك
اوانها رأت انها تليق بهذه الوضعية
المهم انك فعلتى الصواب
ولا تندمى ربما جعلك الله سببا لخير لايعلمه الا هو
تحياتى

http://kasperb4.blogspot.com/ يقول...

الحكاية بسيطة بس واضح انك مكنتيش اصلا مستريحة للشخص حتى قبل ما يتثير الموضوع اللي عمل المشكلة دي

هقولك على وجهة نظري ف الموضوع بصراحة

القصة مش انك تخرجي عن شرع ربنا لو رفضتي التعدد
انتي من حقك انك متوافقيش ان زوجك يتزوج عليكي
اعتقد انه لو الزوج تزوج على زوجته غصب عنها مش هيقدر يحقق العدل اللي ربنا طلبه مننا

امال امتى بقى تخرجي فعلا عن الشرع ؟؟
لو رفضتي التعدد رفض حجود وانكار بالكلية هنا يبقى عندك مشكلة ايمانية

بس كده دي رؤيتي للموضوع

بالنسبة لصاحبتك اللي انتي حاسة انها زعلت منك انا معتقدش انها زعلت منك بدليل انها كانت متمسكة بيكي ف القعدة يعني بتحبك اوي
اصبري بس شوية وحاولي تكلميها انتي وتفهمي منها
ده طبعا لو كنتي لسة متكلمتيهاش

واسف للاطالة
------------
مدوناتك الاربعة حلوين وبتابعهم

تفبلي تحيتي

Unknown يقول...

للأسف ان الجماعة اللي بيسموا نفسهم متدينين أو ملتزمين عندهم سقطات كتيرة جدا

وعندهم يقين رهيب ان أي حد مش ماشي بيعمل زي ماهما بيعملوا يبقي ممكن يوصل في نظرهم لحد الكفر

اللهم اهدنا واياهم

وانتي مش غلطانة لو صاحبتك زعلانة منك بسبب ردك ده يبقي اسمحيلي هي اللي غلطانة

Unknown يقول...

حسن مشالى

نورتنى بجد بردك وعندك كل حق هو واخد الدين ستار لاهدافة

آلام وآمال

انا مش رافضة التعدد لان محدش يقدر يرفض شرع ربنا بس بشروطة الى وضعها ربنا مش نمشى وراء اهافنا الخاصة ونقول شرع ربنا
تحياتى وشكرا للزيارة


fanan fa2eer

شكرا للزيارة ولرايك وفعلا ربنا يهدى هية مش زعلانة منى
هية مغلوبة على امرها بجد
ادعولها ربنا يكون معها ويقويها

سابرينا يقول...

يابنتي
باين عليكي طيبه!!!!
أيوه انت غلطانه
لأن فيه ناس ببساطه عمرك ماهتقدري تغييري تفكيرهم!!بالعكس
هتتعبي نفسك علي الفاضيييييييي
الناس اللي فاكريين نفسهم متدينين
والباقي غلط!!!
أو النوع التاني
اللي يعملو كل اللي نفسهم فيه
ولأصلأةو ولأالتزام
ولأأخلأق!!!!!!!!
ويقولوا أحنا بنحب ربنا
مع ان أبسط قواعد الحب أنك تعمل للي بتحبه اللي يرضيه!!!!
النوعين دول مافيهموش فايده ابدأ
متحاوليش تصلحي الكون لأنه مش هيتصلح
أنت اللي أعصابك هتتعب!!!!

Unknown يقول...

والله سابرينا

عندك حق انا الى بتعب واضح انى لازم ابطل احشر نفسى

Unknown يقول...

أستاذة اّية

المفروض ياسيدتى أن اختلاف الرأى لا يفسد للود قضية
و فى هذه الحالة قد هان على صاحبتك الرأى و تبعه الود
لكن التمسى لها العذر , فان ثوبا لا ترتضيه لنفسك قد يزهو به غيرك وشاحا

هيثم حرفوش

Unknown يقول...

استاذ هيثم

اسفة للتاخرفى الرد بس لعطل فى النت
شكرا للزيارة
انا الحقيقة حاسة انها مغصوبة ودة الى مزعلنى

Dr. Eyad Harfoush يقول...

لا يا عزيزتي، لو أنك لم تتكلمي و تقولي لهذا العلج ما يستحق فلن تكوني آية المدونين، حفظ الله لك لسانك و لا تكترثي لفقد هذه الصديقة، فلو أنها لم تقدر لك ما فعلتيه لأجلها فهي لا تستحق الصداقة، و لو أنها رأت فيه خيرا فقدته بسببك فتلك عقلية لا تتوافق مع عقليتك، و لا ايه؟

Unknown يقول...

د اياد

والله متشكرة بجد لكلامك دة هية المشكلة الاكتر انها مغصوبة علية وبرفضها لية شافت ايام سودة بجد
ربنا معها

الطائر الحزين يقول...

حضرتك اعتذرتى على القسوة فى كلامك مع انى لم اغضب لأن لكل منا وجهة نظرة

اما انك تقولى عيزين يرجعونا 100 سنة لورا
طيب ياريت يا ستى مش 100 بس ياريت يبقوا 1400 ونبقى مع الرسول
الا تعلمى قوله صلى الله علية وسلم خير الازمان هو زمن رسول الله ثم الذى يلية ثم الذى يلية .... عرفتى حضرتك الفرق بيننا وبين ا100 سنة الماضية

وطبعا لن ارد على الأخ الذى علق على كلامى فى مدونتك لان هذا لا يليق
هدانا الله واياكم

lonlysmily يقول...

ناس كتير شايفه الدين صلاه صوم قران واكتفى بنفسى وحياتى بس
كل الحجات دى تمام بس مينفعش اعيش فى عزله مينفعش اعبد ربى لوحدى محدش يستفيد منى
ربنا مش خلقنا بس علشان العبادة بس علشان نكون خليفته فى الارض
بيتهيالى ربنا ميرضاش خلفائه يكونوا بالشكل دا وبالاسلوب دا وبالطريقه دى
ويارب تكون صحبتك مش قاطعتك علشان السبب او الشخص دا...
ربنا يهدى الجميع
مدونتك جامده;)

Unknown يقول...

لونلى سميل

شكرا للزيارة واسفة لتاخرى فى الرد وارجو تكرار الزيارة وفعلا عندك حق ياريت خلفاء ربنا ميسبقوش كدة

عزيزى الطائر الحزين

انا لا اكرة بل اتمنى ان اعود الى عصر النبوة لانها وقت الدين الصحيح مش مدعيين التدين واخدين صورة التدين فقط

وأما الجدار

في رحلة حياتنا نصادف جدران عديدة  قد يلفت نظرنا روعة تصميمة ورونقة أو تهدمة وشقوقة  لكننا نمر وننسي الجدار الرائع الذي أدخل  البهجة لنفوسنا...